Nongpoh, Naiwieng 11
U Myntri Khynnah jong ka Sorkar Pdeng ba dei khmih ïa ka tnat Consumer Affairs, Food and Public Distribution, u B.L. Verma ha ka sngi Ba-ar u la hiar ïuh kjat ha Ri Bhoi District ban pynlong ïa ka jingjurip ba-ar sngi lynter ïa ka jingpyntreikam bad ïaid beit jong kiba bun tylli ki skhim pynroi ka Sorkar Pdeng kiba la mang pisa kyrpang lyngba ka Aspirational District Programme.
Ha kane ka jingwan jurip, ïa u B.L. Verma la synran lang da u Bah Jonathan Shylla, Additional Deputy Commissioner ka Ri-Bhoi District, ka E Pradhan, Assistant Commissioner nalor kiwei-kiwei ki heh ophisar na ki tnat treikam Sorkar ka district.
Ha kane ka sngi, u Myntri Khynnah nyngkong u la leit ban jurip shwa ïa ka One Stop Centre kaba don ha Nongpoh, pynbud sa ka jingleit jurip ïa ka Mawtnum Fair Price Shop, nangta de sa ïa ka Umdihar Food Processing Unit bad khatduh pat ha Umroi Health and Wellness Centre.
Ha kitei ki jingjurip, na ka liang u Myntri Khynnah u la ïoh ban sakhi dalade ïa ka rukom treikam kitei ki jaka bad ruh ban ïakren bad ki nongpynïaid, ki heh ophisar bad ki paidbah kiba ïadon bynta ha kitei ki jaka.
Ka jingthmu ba kongsan hi jong katei ka jingwan jurip u Myntri Khynnah ka Sorkar Pdeng ka long ban wanrah ïa ka jingkhuid jingsuba bad ka jingpyntrei hok ïa kitei ki skhim kiba ka Sorkar Pdeng kala mang kyrpang na ka bynta ban kyntiew ïa ka ïoh ka kot bad ka roi ka par jong ka district.
La ïoh jingtip ruh ba na ka liang u Myntri Khynnah ka Sorkar Pdeng, un sa shong jingïalang ruh lashai ka sngi bad ki heh ophisar ka Ri-Bhoi ban ïathir halor kitei ki jinglap ki jong u bad kumno ban dang pynbha shuh shuh ïa ki sienjam ban treikam nangne shakhmat hashwa ba un ai jingkren sha ki nongthoh khubor ka Jylla.
