Shillong, Naiwieng 11
Ka Hynñiewtrep National Youth Front, bad ka Shillong Municipal Board ha ryngkat ka jingsynranlang ki Magistrate bad ki pulit ha ka 11 tarik u Naiwieng 2025, ki la leit ban khynra lisen khaïi ha shi lynter ka GS Road, da kaba sdang naduh Motphran ter-ter, Bhutia, Umsohsun shaduh sha Khyndailad.
Ha kane ka jingleit jurip, la lap ba ki don shibun ki dukan ki bym pat don ïa ka lisen khaïi bad ki don bun ruh ki bym shym la pynthymmai shuh ïa ka lisen jong ki, kiba la kut por naduh ki snem 2016-2017 bad kumta ter-ter.
Nalor kata, la lap ruh ba ki don ki dukan ki bym pat leh ïa lisen khaïi jong ka Shillong Municipal Board (SMB) bad ki dukan kiba dei na ‘Schedule area’ ki pyni da ka lisen Khasi Hills Autonomous District Council hynrei kim don pat ïa ka lisen khaïi jong ka Municipal Board.
Kumta ka HNYF bad ka SMB ki la phah khangnoh shi syndon ïa kitei ki dukan da kaba bthah ruh ba kin leh noh ïa ka lisen khaïi hapoh 15 sngi, lym kumta kin nym shah ban kin plie ïa ki dukan jong ki.
Haba kren sha ki lad pathai khubor, u President ka HNYF, EKH, u Bah Steve Khyriem u la thalaiñ tyngeh ïa kawei ka longkmie kaba shong khrong ha Khyndailad, wat hadien ba ka Shillong Municipal Board ka la dep pynbiang ka jaka ïa ki nongdie madan.
U la ong ba kane ka jingleh jong katei ka longkmie Khasi ka la pynpoh dor ïa ka jaidbynriew, nalor ba kadei ka briew kaba biang ki kti ki kjat.
“Katei ka longkmie ka shong ‘standard’ ha ryngkat ka peit phone bad ka rkhie, ka shong ban khrong ha Khyndailad. Kane ka jingleh jong ka, ka pynthohbria ïa ka jaidbynriew,” ong u Bah Steve.
