Ka Nongnah ka shnong kaba don ha ka thaiñ Riwar sepngi ka South West Khasi District. Ka hap hapoh ka Hima Maharam Syiemship. Ka long ka shnong kaba itynnad tam hapoh ri Khasi lah ban ong ha ka Scenery ne ka jinglong ki lum ki wah ba la oh shrong ka Mei Mariang. Kane ym dei ba shu ïaroh ïa ka jingitynnad jong kane ka shnong. Ka da long shisha lada phi wan ban peit da la ki khmat ïa ki sawdong sawkun jong ka. Ka Nongnah ka long ka shnong kaba la ker da ki riat mawsiang (Cliff/Natural Fort) lait noh phang shathie la ker da u Lum ka Iawpaw ba long kum ka kynroh bah. Ka Nongnah mynta ka la don phra kyntoit shnong kiba pynlong ïa ka Nongnah. Hapoh area Nongnah ym da long ban rep ban riang namar ka long ka jaka ba la tap da ki phlang bad ki maw.
Ka shnong ka long kum ka Table Land. Ki jaka rep hapoh Nongnah ki pajih hap ban leit rep sha trai ki riat balong lyhuh bah. Hap ban ïaid da palat shi kynta haduh lai kynta ban poi ha ki jaka rep. Hapoh Nongnah kiba bun eh kiba don ha ka Balang Presbyterian bad ka Balang U Blei (Church of God). Kiwei kiwei ki balang ki long khyndiat. Ka Nongnah ka long ka shnong kaba la rim bha jong kane ka thaiñ. Ki jaka jngoh kai ba itynnad hapoh Nongnah ki long kiba eh ïa ki nongwan jngoh kai (Tourist) ban leit jngoh namar ka jinglong sharing ki lum ki wah. Ki jaka ba kham khring ban leit jngoh kai ki long kaba nyngkong dei ka Tynrong riat Bamon ka jaka kaba ki ïaleh thma bad u phareng kaba don phang mihngi na Mawtajem. Kaba ar ka dei ka Pung Sum Shrieh ka don phang shathie na Nongktieh.
Kaba lai ka dei ka Krem Mawtynhiang ha u Lum Iawpaw. Kaba saw ka dei ka jingkieng Jri, kaba don phang Sepngi na shnong Thangrai sha Pyndentraw ban noh sha riat Synrang Wahtit. Bad kaba san ka dei ka jaka ba khot Syn-piar kaba don phang sepngi u Lum ka Iawpaw ka long ka jaka kaba itynnad kaba long mawtynhiang halor u lum Iawpaw bad ka long ka jaka leit bamkhana (Picnic) kaba itynnad bha lada phi poi hangne. Kaba hynriew ki dei ki matti u barim ki dei ki jingkieng ba pun da u maw ha phot shnong Thangrai, kata ka jingkieng Mawpait, Mawjanka bad ka Ur – ka – khlem. Kaba hynniew ka dei ka View Point kaba don ha shiteng u lum Iawpaw ha khlieh ka shnong Domsohkhai. Shi lynter phin iaid kai bud ïa ki thmier riat naduh Tynrong riat Bamon sha Nongbah, Tynrong Wantong, haduh shnong Thangrai phin ioh dih ïa ka lyer pyngngad ba – temon batesi kaba wan mih na ki them bad ki lyhuh bah. Dang bun ki jaka ba itynnad khamtam ha kliar u Lum Iawpaw ban leit jngoh kai hynrei ym don lad bad ym pat lah ban pynpaw namar ka jinglong sniew ki jaka bym don lynti. Wat ki lynti rim ki riew hyndai ruh ki la jot la pra ka la shitom ban ïaid. Kane ka long ka jingitynnad (Beauty Natural) jong ka shnong Nongnah.
C. B. Iawphniaw
