Nongstoiñ, Naiwieng 11
Da ka jingthmu ban kyntiew ïa ki sap ki phong jong ki khynnah ha ka put ka tem, ka Mawduh Deficit Upper Primary School kaba dei kawei na ki skul ha ka thaiñ Nongkhnum, West Khasi Hills District ka la ïoh ban plie ïa ka Music Class ha katei ka skul.
Ki nongpynïaid jong ka skul, haba pynpaw halor kane ki la ong ba kane ka skul ka la shim ïa katei ka rai ban plie ïa ka Music Class ha ka skul ka long hadien ba ka la ïohi ïa ka nuksa na u Babu Shemphang Khardewsaw uba dei uwei na ki nonghikai skul uba la pawnam bha ha ka put ka tem ha ka thaiñ West Khasi Hills District uba ju mlien ban hikai jingrwai ïa ki khynnah skul Byrki.
Nalor katei ka jingplie ïa ka Music Class, ka skul ka la rakhe ruh ïa ka Children’s day ha ka 11 tarik u Naiwieng kaba hap ruh ka tarik sngikha u Pandit Jawaharlal Nehru u President ba nyngkong eh ka Ri India bad la ong ba la rakhe noh ha katei ka tarik namar ha ka 14 tarik kaba dei hok ka Children’s day la ïatyngkhuh noh bad ka jingsdang ki eksamin jong ka skul.
U Babu Shemphang kum u kongsan u la khap ïa u ribbon kum ka dak jong ka jingplie ïa ka Music Class bad ki khynnah skul ki la ot ruh ïa u Cake kum ka dak jong ka jingrakhe lehkmen kyrpang ïa ka Children’s Day. Hadien ka jingïalang kaba lyngkot ka skul ka la pynlong ruh ïa ki prokram bapher bapher kynthup naduh ki jingshad, jingrwai, jingkyntip bad kiwei-kiwei bad la pynïaid ïa katei ka jingïalang da ka samla Pdianghun K Sohphoh, Headmistress ka Mawduh Deficit Upper Primary School ha ka jingïadonlang u Babu O Sangriang bad u Babu Pressman Ïawren u ban dei u nonghikai ïa ka put ka tem ïa ki khynnah ha katei ka shlem.
U Babu Shemphang haba ai jingkren u la ong, ka put ka tem ka dei kawei na ki mat kaba ki khynnah ki dei ban nang bad ka dei ruh ka ktien pyrthei ha kaba baroh ki briew kiba sngap kim sngewthuh ïa ki kyntien pynban ki sngewtynnad pat ïa ki jingtem.
Katba u Babu O Sangriang u la ong ba ka put ka tem ka la dei kawei na ki lad kaba pynmyntoi ïa ki khynnah na ka bynta ka lawei bad ka Sorkar ka la dei ban phai khmat bha ha ka put ka tem ban pynrung ha ki skul bapher-bapher ne ban ai mynsiem ha ka put ka tem khnang ba kan nangrah ïa ki khynnah ha ka sap ka phong sha kawei ka rynsan kaba pynmyntoi.
