Shillong, Naiwieng 11
U President ka Meghalaya Pradesh Congress Committee (MPCC) u Bah Vincent H Pala uba dei ruh u MP barim ka Shillong u la ther tyngeh ïa ka Sorkar Jylla bad ruh ïa ka Khasi Hills Autonomous District Council (KHADC) halor ki jingkynnoh ba ki la pynïeng da ki bun tylli ki khyrdop, da kaba ai kyrteng ïa ki kum ki “ATM” kiba khrong pisa jubor na ki nongñiah trok bad ki paidbah.
U Bah Pala u la kam ba ki khyrdop khrong pisa ki la nang kiew bad bun naduh ba ka Voice of the People Party (VPP) ka la wan ha ka bor synshar ha KHADC, ha kaba ym duna ïa ka 10 tylli ki khyrdop thymmai la pynrung na ki 24-25 tylli kiba la don lypa, kaba wanrah ïa ka jingbamsap khlem da tehlakam bad ka jingshah pyndik jong ki nongñiah kali.
“Ki khyrdop, kiba la ju long kum ki “ATM” na ka bynta ka NPP bad ka BJP, mynta ki la kylla long ka lad kamai kaba kamai bha na ka bynta ka VPP ruh kumjuh, ha kaba ka VPP ka la pynbun shuh-shuh ïa ki khyrdop. Mynshuwa, ka District Council ka don haduh 24-25 tylli ki khyrdop; hynrei naduh ba wan ka VPP ha ka bor ha KHADC, la pynïeng sa kumba shiphew tylli ki khyrdop, kaba la pynsniew shuh-shuh ïa ka jinglong jingman,” u la ong bad bynrap ba ki paidbah ki la kylla sohpdung bad mad jingeh na ka jingkiew dor jong ki marbam mardih.
Katkum ka jingong jong u, ka long kaba sngewlehraiñ ban ïohi ba ki trok ki shah pynsangeh ha manla ki khyrdop thew (weighbridge), ha kaba ki nongñiah trok ki shah pynbor ban siew ïa ka pisa kaba palat pud khlem ki ‘receipts’ ne ki ‘check’.
“Ka jingdon jong ki khyrdop kaba phylla ka don ha ki surok bypass, ha kaba bun ki khyrdop ki mih hapoh ki jingjngai kiba lyngkot – 20 kilomitar ha (ka Shillong bypass) bad tang 7 kilomitar ha ka surok Jowai bypass,” la ong u Bah Pala da kaba bynrap “Ka rukom treikam kaba kham ryntih ban lum khajna, ha kaba ka Sorkar ruh ka la ailad pynban ïa ka jingmih bun ki khyrdop lum khajna ban pynïohnong, kaba bunsien la pynïadei bad ki Myntri, ki MLA, ki MDC, bad ka tnat Khlaw, kaba wanrah ïa ka kam bamsap. Ka Meghalaya ka pawnam na ka bynta ka jingdon ki weighbridge jong ka kiba don ha manla ki jaka, ha kaba ki trok ki ju shah pynsangeh bad pynbor ban siew pisa katba mon, bunsien khlem da don ki ‘receipts’ ne ‘check’ kiba biang kumba la ïohi ha Mukhla, Khliehtyrshi bad Umling.”
U la pynpaw ïa ka jingsngewkhia halor ka jingeh jong ki nongñiah kali kiba nabar, kiba ju shah thombor namar ka jingbym tip ïa ki kyndon.
U Bah Pala u la pynbna ba ka Congress ka la rai ban pan Right to Information (RTI) ban lum ïa ki sakhi sabut halor ka jingkynnoh bamsap bad dawa pisa, da ka jingthmu ban rah ïa kane ka kam sha ka ïingbishar.
“Ka seng kan sa pan RTI shen, da kaba wad ïa ka jingshai ha ki jingpynbna Sorkar bad ki dor weighbridge. Ka kynhun aiñ jong ngi ka dang pynkhreh ïa ka RTI, ïa kiba yn sa aiti sha ki tnat ba dei peit, da kaba thmu ban sei madan ïa ki jingbym ïahap ha ka rukom treikam kaba mynta. Khamtam lei ban pan jingpynshai halor ka dor jong ka Sorkar, naba ki nongñiah kali ki la kam ba ki hap ban siew T.2000 ha ki weighbridge,” u la ong.
