Tennessee, Naiwieng:
Kawei ka liengsuiñ ‘helicopter’ ka la leit hap bakla ha ka thaiñ Mihngi jong ka Nashville jong ka nongbah Tennessee ha ka Sngi Saitjaiñ, ha kaba uwei u dkhot jong katei ka liengsuiñ u la khlad hashen bad 2 ngut kiwei pat ki la mynsaw jur na katei ka jingjia. Katei ka liengsuiñ ka dei ka liengsuiñ kit nongpang hynrei la iathuh ba ym shym don nongpang ne kit nongpang ha ka por ba katei ka jingjia ka la jia ha katei ka sngi.
Ka helicopter Vanderbilt LifeFlight, ka la hap ha ka por kumba 1:45 baje janmiet, ha kawei ka madan, kaba don sha ka Phang Mihngi jong ka Nashville, kaba don hapdeng jong ka Lebanon bad ka Gallatin, kumba 22 miles (35 Kilometres) ka jingjngai na ka phang Sihngi jong ka Nashville.
Kane ka helicopter ka la hap kumba 12 miles (19 kilometres) sha ka phang Shathie jong ka Music City Executive Airport bad ka ktem jongka, ha Sumner County Emergency Operations Centre.
Na ka liang jong ka tnat National Transportation Safety Board, ka la pynbna bad pyntip ruh ba ka dang bud-dien bad pynlong ia ka jingtohkit kaba bniah haba iadei bad kane ka kam.
Kitei ki arngut ki nongtrei kiba la mynsaw ki dang shah sumar mynta hapoh ka Vanderbilt University Hospital ha Nashville, ong ka kyrwoh jong ka Vanderbilt LifeFlight. Kum kine ki liengsuiñ ki ju kit ïa u nongñiah liengsuiñ, u nongsumar bad ka nongsumar.
Katei ka helicopter, kaba dei ka Airbus EC130T2, ka dei kaba la shna ha u snem 2015, katkum ki jingthoh jong ka sorkar pdeng.
Katkum ki website ba buddien ïa ki liengsuiñ FlightAware bad Flightradar24, la ong ba kane ka helicopter ka la kiew na ka jaka treikam ba kyrkieh ha ka por 1:33 baje janmiet bad ka la her haduh 8 minit shwa ba kan hap.
