Shillong, Naiwieng 11
U khlieh nongïalam ka Congress uba dei ruh u MP barim ka Shillong, u Bah Vincent H. Pala u la kynnoh ïa ka Sorkar Jylla halor ka jingïakhih kaba dang ïaid jong ka Meghalaya Commercial Truck Owners and Drivers Association (MCTODA), da kaba ong ba kane ka mat ka dei namar ka jingbym larkam jong ka Sorkar.
U Bah Pala uba la leit jngoh ïa ka Jowai ha ka Lah Sngi U Blei, u la pynpaw ka jingsngewkhia ïa ki nongñiah trok bad ki trai dukan kiba shah ktah na kane ka jingïakhih.
“Nga la ïohi ïa ki, ki dang ïakhih hi ha shi lynter surok. Nga sngewsynei ïa ki nongñiah trok bad ym tang ïa ki hynrei ka ktah ruh ïa ki trai dukan namarba ka jingïakhih i-kumba kam poi shano-shano ruh,” u la ong.
U la kdew ba ki daw jong ka jingïakhih ka dei namar ka jingduk bad ka jingbym don da kiwei pat ki lad kamai na ka bynta ki nongñiah trok.
“Ka jingeh kaba kongsan ka mih na ka jingduk kaba la saphriang, kaba iehnoh ïa ki nongñiah trok bad ki lad ki lynti kiba duna, naba ka tyllong kamai ba kongsan jong ki, ka don jingïadei bad ki karkhana pynmih dewbilat. Ha ka jingshisha, ki la dei ban pynïar ïa ki jingshakri jong ki, da kaba kit dewïong, ki dieng, lane kiwei-kiwei ki mar, hynrei mynta, ym don ki lad ki lynti kiba lah ban trei, kaba pynlong pat ïa ki ban shaniah ha ki karkhana pynmih dewbilat na bynta ban im,” ong u nongïalam ka Congress.
U Bah Pala u la ban jur ba ka jingeh ka dei hapdeng ki kynhun ‘riew shimet bad dei ban pynbeit lyngba ka jingïasngewthuh jingmut lang.
“Kane ka dei pura ka mat jong ka jingdawa bad jingpynbiang hapdeng ki kynhun ‘riew shimet bad ka shong ha ka jingïateh ba la shim hapdeng jong ki. Kum ka seng, ngi sngew ba kam long kaba bha ïa ngi ban tuklar bad leh politik ha man la ka jingïakhih,” u la ong.
“Ngi la ïakren halor kane ka mat ha ka jingïalang jong ngi, bad ka Congress ka don la ka jong ka nongrim, kaba pher na kiwei pat ki seng saiñ pyrthei. Katba kiwei pat ki seng ki lah ban jied da kaba tuklar, ka seng jong ngi ka ngeit ha ka ban ailad ïa ki nongshim bynta – ki trai trok bad ki kompeni pynmih dewbilat – ban ïashim bynta ha ka jingïakren bad ban poi sha ka jingpynbeit naba ki dei kiba kongsan ha ka ïoh ka kot jong ngi.”
U la kynthoh ruh ïa ka jingpynbna ka Sorkar kaba buh dor ïa ki kynhun ‘riew shimet da kaba ong, “Ha ka jingshisha, ka Sorkar ka la palat ïa u pud jong ka da kaba buh dor ïa ki kynhun shimet, kaba pynlong pat ïa ka jingpynbna ban long kaba bakla. Ka bynta jong ka Sorkar ka dei tang ban pynbeit ïa la ki jong ki kam ki jam, ym ban tuklar ïa ki kam shimet. Da kaba pyrshang ban tehlakam ïa ka jingdawa bad jingpynbiang, ka Sorkar ka la bakla. Ka sienjam kaba kham phikir kan jin da la long ban buh ïa ka ‘Benchmark Rate’, kaba ailad ïa ki trok bad ki karkhana pynmih dewbilat ban ïakren halor ki kyndon kiba lah ban pdiang lang.”
U Bah Pala u la kynnoh ruh ïa ka Sorkar halor ka jingbamsap, da kaba kdew ïa ki jaka talasi ne ‘Checkpoint’ kiba bun ha shilynter ka lynti ïaid kali, ha kaba ki trok ki shah dawa pisa.
“Ki trok ki hap ban sangeh bad siew ha man la ki ‘Weighbridge’. Ki nongñiah trok ki mad jingeh namar ka jingkynnoh rukom treikam ba bamsap jong ka Sorkar Jylla,” u la ong.
“Kum ka nuksa, ki trok kiba ïaid na Khliehriat ki shah pynbor ban siew ha 14-15 tylli ki khyrdop, ryngkat ka jingsiew kaba palat pud ha Khliehtyrshi bad Mukhla, ha kaba ka bai thew jingkhia kaba tikna ka long tang T.30-50, hynrei ki nongñiah trok ki hap ban siew T.2000. Kumjuh ha Umling, ka jingsiew ka kiew haduh palat T.8000, kaba mut ba ka pisa kaba shyrkhei (T.10,000) ka leit sha ki Myntri bad ki ophisar,” u Bah Pala u la kynnoh da kaba bynrap ba kane ka dei ka jingmih na ki mat treikam bamsap jong ka Sorkar, kaba buh jingeh shi kat dei ïa ki nongñiah trok.
Shuh shuh u la kyntu ïa ka Sorkar ban pyntikna ïa ka shong suk shong shngaiñ bad ban ailad ïa ki trok ban treikam.
“Ngam kyrshan ïa ki jingjia ba thombor ïa ki nongñiah kali ba nabar ka Jylla. Ka Sorkar Jylla ka dei ban shim ïa ki lad ki lynti ban pyntikna ba kan ym don kano-kano ka jingthut ha ka shong suk shong shngaiñ. Ka Sorkar kam lah ban tehlakam tang ïa ki 100-200 ngut ki nongñiah kali bad 4-5 tylli ki karkhana pynmih dewbilat; kumno phi khmih lynti ba kan pynïaid ne pynbeit ïa ki mat kiba eh?,” la ong u Bah Pala.
