New Delhi, Naiwieng:
Ka National Investigation Agency (NIA) kaba dang tohkit ïa ka jingthmu ban pynkhie-im biang ïa ka kynhun lehnoh Liberation Tigers of Tamil Eelam (LTTE), ka la lap ba u nongkhaïi drok na Sri Lanka, u C Gunashekaran ba la tip ruh da ka kyrteng kum u Guna, u la ai ïa ka pisa ba mih na u drok ba la die beaiñ sha ki paralok jong u nongkhaïi tiar siat bad drok ba pawnam ha Karachi, uba dei u Haji Salim, la ong ki briew kiba tip kham bniah halor kane ka jingjia.
Ka kynhun NIA ka la ai ïa kine ki jingai jingmut hakhmat ka ïingbishar ha ka 17 tarik u Risaw katba ka dang pyrshah ïa ka jingkyrpad ban pyllait ba la buh da u Guna, uba la shah kem ryngkat bad khyndai ngut kiwei pat ki nong Sri Lanka ha Tamil Nadu ha u bnai Nohprah 2022 ha kaba ïadei bad ka mukotduma ban pynkhie-im biang ïa ka LTTE.
Ha ka 15 tarik Lber, 2022, u Guna bad u Pushparajah ba la tip ruh da ka kyrteng kum u Pookutti Kanna, uwei pat u nongkhaïi drok na Sri Lanka, ki la pynlong ïa ka jingïalang ha kawei ka ktem set ba kyrpang ha Trichy ryngkat bad kiwei pat kiba shah kynnoh. Ki la leh da ka jingthmu kaba ïadei lang “ban lum pisa bad ki tiar ïaleh kiba bun lyngba ka jingkhaïi drok bad jingkhaïi tiar be-aiñ ryngkat bad ka jingïatreilang jong u Haji Salim, u nongkhaïi drok bad tiar ïaleh ba pawnam jong ka ri ba marjan sha India bad Sri Lanka na ka bynta ban pynim biang ïa ka seng lehnoh ba la khang pyrshah ka ophis jong ka Sri Lanka, la ong u heh sorkar ubym kwah ban pynpaw kyrteng ba ïadei bad ka kynhun NIA hakhmat ka ïingbishar.
“Ki sakhi na ka Digital ba la ïoh na ki tiar ba la kurup na u Gunasekaran bad u khun jong u, u Thilipan, ki kynthup ïa ki jingïadei bad ki jingthoh halor ka pisa kiba ïadei bad ki klur tyngka ba la phah sha ki jaka ba shabar, kaba pyni ïa ka jingïadei ba beit bad ka LTTE bad ki kam pynmih pisa,” la bynrap biang u ophisar.
Ka kynhun LTTE ka la mih ha u snem 1976 bad ka la mih kum kawei na ki kynhun lehnoh kaba pynïap briew bha ha kine ki snem. Ka India, ka la khang ïa katei ka kynhun, hadien ba la pynïap ïa u Myntri Rangbahduh barim, u Rajiv Gandhi, ha u snem 1991. Naduh katei ka por, la ñiew beaiñ ïa katei ka kynhun, man la ka san snem.
Kane ka kynhun ka la mad ïa ka jingshah rem ha ki thma ha Sri Lanka ha u snem 2009 hadien ka jingshah pynïap u heh jong ka, u Velupillai Prabhakaran.
Ha u Jylliew jong u snem 2023, ka kynhun NIA ka la mudui halor ka jingïasuhbuit sniew pyrshah ïa ki 10 ngut ki nong Sri Lanka, ba kynthup ïa u Guna, bad lai ngut ki nong India.
Sa uwei pat u ophisar u la ong ba ka jingkynnoh jong ka kynhun NIA ka la dep ban batai bniah “ïa ka jingthmu ba la shna bha kaba kynthup ïa ki kynhun beaiñ, ki jingpynïaid ïa ki jingdih pynbuaid, bad ki jingïaid ïew ba la pynshong nongrim ha ka rukom phah pisa, kiba la thmu ban bei tyngka ïa ki kam lehnoh bad ban kyrshan ïa ka jingpynkhie-im biang ïa ka kynhun LTTE.”
Haba ïadei bad ka jingai pisa sha u Haji Salim, u ophisar ba ar u la ong: “Ka bynta jong ka jingmih na ka jingdie drok la pynkylla da u Thilipan lyngba ki pisa ba la phah kum ka USDT da ka jingïatreilang bad ki jaka khaïi bad phah sha ki paralok jong u Salim kiba treikam na UAE, na ka bynta ban thied shuh shuh ïa ki jingdih pynbuaid bad ki tiar siat.”
“Kine ki kam ki ïaid sha jngai palat na ki jingsngewthuh ha ka liang ka jingmut jingpyrkhat bad ki long kum ka jingïashim bynta kaba radbah bad ka jingpynsuk ïa ka jingpynkhie-im biang ïa ka seng ba la shah ñiew beaiñ,” la bynrap biang une u ophisar.
U Salim, u dei uba la tip ba u trei lang bad ka kynhun ISI, ka kynhun lehnoh Lashkar-e-Taiba (LeT) bad ka kynhun runar jong u Dawood Ibrahim bad u peit ïa ka jingkhaïi tuh ïa ki tiar ïaleh bad drok ha India lyngba na duriaw.
Ki heh sorkar ki la ïathuh ba ki la dep ban ïakynduh ïa ki bor pynïaid jong ka Sri Lanka ha kaba ïadei bad ki kam jong u Guna bad kiwei kiwei.
Haba pynjlan ïa ka jingñiew beaiñ ïa ka kynhun LTTE, ka Ministry of Home Affairs (MHA) ha u bnai Jymmang 2024 ka la ong ba kane ka kynhun ka pynroi ïa ka jinglong ban ïakhlad hapdeng ki paidbah bad pynkhlaiñ ïa ka jingkyrshan ïa ka ha India, khamtam ha Tamil Nadu, nalor ba ka buh jingma ïa ka jinglong trai ri jong ka ri.
“Wat hadien ka jingshah rem ha ki jingïaleh jong ka ha u bnai Jymmang, 2009 ha Sri Lanka, ka LTTE kam shym la iehnoh ïa ka jingmut jong ka ‘Eelam’ (ka jylla Tamil ba kyrpang ba la shah pynkhlad) bad ka la trei na lyndet na ka bynta ka ‘Eelam’ da kaba shim ïa ki kam ban pynmih pisa bad ki kam pynphriang khubor halor ki kam ka seng bad ki nongïalam kiba dang sah ki la pynlong ruh ïa ki jingïakynduh bad jingïatylli ban pynkhlaiñ ïa ki kam hapoh ka thaiñ bad sha kiwei ki ri,”la ong ka MHA.
