Shillong, Naiwieng 11
Ka Jakrem SC bad ka Na Rympei Football Academy ki la long ba la pynkhreh ban ïakhun ïa ka final na ka bynta ban ïaknieh ïa ka nam lahduh ha ka Meghalaya Women’s State League 2025 ba la pynïaid da ka Meghalaya Football Association (MFA) ka ban long ha ka sngi Balang ha SSA Stadium, Polo ha ka por 4 baje janmiet.
Ha kane ka lympung kaba nyngkong eh, ki la don kumba 20 tylli ki kynhun kiba la wan ïashim bynta bad la plie ha ka 20 tarik u Nailur mynta ka snem, bad haba kheiñ kyllum hashwa jong ka phainal, la lah ban pynlong haduh 33 tylli ki jingïalehkai.
Kaba ktik bad pynshon jingmut bha ïa ki nongkitkam ka MFA ka long ba dei lyngba kane ka lympung kan plie lad ïa ka kynhun ki ‘thei ïalehkai phutbol ka Jylla ba kin lah ruh wat ban poi ïashim bynta sha ka Indian Women’s League.
Kumba ka long ïa mynta, kum ka Jylla ka dap da ka jingsngew sarong, ba lai ngut ki samla ïalehkai ba kynthup ïa ka Bonifilia Shullai, Alisha Lyngdoh bad ka Ribansi Jamu ki la ïoh ban da mihkhmat ïa ka ri India ha ka kyrdan ïakhun ka U-17 bad ka U-20, kiba la bteng ban da jam artad lang shakhmat kum ka kynhun sha ka Asian Football Confederation.
Haba phai biang sha ka phainal, na ka liang ka kynhun ki ‘thei ïalehkai ka Jakrem bad ka Na Rympei FA, jia ryngkhat ba kim dei ki kynhun ïalehkai kiba ka thymmei ka jong ki kan dei nangne na ka nongbah, pynban ka kynhun ïalehkai ka Jakrem ka wan mihkhmat lyngba ka Mawkyrwat District Sports Association, katba ka Na Rympei FA, ka la mihkhmat na Ri-Bhoi District Sports Association bad ba la khmih lynti ba kane ka jingïakhun hi kan long kaba itynnad bad kaba pynhun ïa ki nongpeitkai.
