Shillong, Naiwieng 11
Shi bynta ban pynpaw lem ïa ka jingsngew khia ki khynnah ïalehkai ba kin hap ban nang ha ka ban bate ïa la ka por pule jong ki, kaba juh ïa takhuh bha pat manla ka por bad ki almanak ïalehkai jong ka BCCI, ka Meghalaya Cricket Association (MCA) ka la kyntu ïa u Myntri Rangbah ka Jylla u Conrad K Sangma ban ailad da ka por ïa ki khynnah ba dangpule ba kin ïaleh ïa ki eksamin jong ki.
Haba ïadei bad kane, na ka liang ka MCA hapoh ka jingïalam u Secretary Bah Rayonald Kharkam -ni, ki la ïakynduh ïa u Myntri Rangbah ha kaba ki la aiti da ka dorkhas, ïa kaba la sakhi lang ruh da u nongaibuit jong u Sangma, u Bah Hamletson Dohling ba dei ruh u President ka Meghalaya Football Asso-ciation bad kumjuh u Myntri ka tnat ïalehkai Bah Wailadmiki Shylla.
Hadien ba la ïoh ka jingpynshai, na ka liang u Myntri Rangbah, u la kular ba un shim khia, ka ban long kum shi bynta ban plie lad wat ïa kiwei ki samla ïalehkai.
Na ka liang ka MCA, ha ka shithi kaba ki la ai sha u Bah Wailadmiki, ka pynpaw ba ki khynnah ïalehkai kriket ba dangleit skul, ki donkam bha bunsien ban don ha ki prokram kilanmet bad hap ruh ban leit ïalehkai shabar na ka Jylla, kaba jia ryngkhat, kane ka ïatakhuh bha khah khah bad ka jingpule jong ki, khamtam leilei ki eksamin jong ki Board, kiba bun na ki khynnah ki mad ïa ki jingeh ban lah ban pynbiang lang ïa kine ha kajuh ka por.
Kumta ha kane ka shithi, ka MCA ka la kyntu ïa ka sorkar ba kan ailad ïa ki khynnah ban shong da kawei pat ka eksamin kaba kyrpang ïa kaba lah ban pynlong ïa ki ha ki por ba kham shadien.
Ïa kane ka mat, ka MCA ka la pynsngew ruh sha ka tnat pule puthi, ba kan ïarap ban shim khia lem, ne ban da thaw syndon da ka mat treikam, ka ban long kum shi bynta ban kyrshan lem ïa ki khynnah ïalehkai kri-ket ha ka por ba ki mihkhmat ïa ka Jylla shabar na la ki ïing.
