Shillong, Naiwieng 11
Ki pulit ka Kolkata, ki la pynkhlaiñ bha ïa ka jingpahara ha Eden Gardens ha Kolkata, lai sngi shwa ban sdang ïa ka jingïa-lehkai Test ba nyngkong hapdeng ka India bad ka South Africa, hadien ka jingbthei bom ha kawei ka kali ha New Delhi hajan Red Fort ha ka lah sngi U Blei.
Baroh ar tylli ki kynhun ïalehkai ki la poi ha kane ka nongbah bad ki dangdon hapoh ka jingïada kaba khlaiñ ha baroh shilynter ka ïingsah jong ki ha kane ka nongbah.
Katei ka jingbthei bom ha Delhi ha ka lah sngi U Blei ka la shim ïa ka jingim jong ki 8 ngut ki mynsiem briew bad mynsaw kumba 25 ngut. Ban long ba la pynkhreh ïa ki lad jingïada halor katei ka jingjia, ki pulit ka Kolkata ki la pynkhlaiñ bha ïa ki bor pahara namar khamtam ïa ka kynhun ïalehkai jong ka India bad South Africa bad kumjuh ha ka por ba ki kilanmet hapoh stadium.
Na ka liang u commissioner ka Kolkata, u Manoj Verma u la leit jngoh ïa ka Eden Gardens, ha ka sngi Ba-ar na ka bynta ban jurip ïa ka jaka ïalehkai bad ruh ban bishar bniah halor ka jingpynbiang ïa ki bor pahara. Wat ka Cricket Associa -tion of Bengal (CAB) ka la ïatreilang bad ki pulit ban pynthikna ïa ki lad jingïada ïa ki nongïalehkai bad ki heh sorkar, ryngkat bad ki nongpeitkai.
Katkum ki khubor, la ong ba la pynkhlaiñ ruh ïa ka jingpahara ha ki jaka sah jong ki nongïalehkai. Ka jingïalang hapdeng ki heh jong ka CAB bad ki pulit la pynlong na ka bynta ban pynbiang ïa ki bor pahara bad ki lad jingïada ba kham bniah hadien ka jingjia ha Delhi.
Ha kajuh ka por, baroh ar tylli ki kynhun ïalehkai jong ka India bad South Africa ki la buh ba kin sdang ïa ki jingkilanmet ha ka sngi Ba-ar ha Eden Gardens hashwa ka jingïalehkai ba nyngkong na ki ar tylli ki jingïalehkai Test series. La pyrkhing bha ïa ki bor pahara hadien ka jingjia kaba sngewsih kaba la jia ha nongbah Delhi. Ka Test kaba ar la buh ban pynlong naduh ka 22 tarik mynta u bnai ha Barsapara Stadium kaba ha Guwahati.
