Shillong, Naiwieng 11
Ka ïingbishar ka District kala sdang ban shong bishar ïa ka mukotduma ba ïadei bad ka jingshah pynïap u Raja Raghuvanshi, da kaba shim bishar ïa kaei kaba u nongmudui bad hynmen jong une uba ïap, Vipin Raghuvanshi u don ban pynpaw.
Ki san ngut ki nongshah kynnoh pynïap, ki kynthup ka kurim u Raja, ka Sonam Raghuvanshi bad ki paralok jong ka, u Raj Kushwaha, Vishal Singh Chauhan, Akash Singh Rajput bad Anand Kurmi kiba pynpaw ba kim donkti satia halor ki jingkynnoh.
U Special Public Prosecutor, KC Gautam u la ong, ka charge-sheet ka long kaba khlaiñ bha bad don kumba 90 ngut ki nongsakhi.
“Tang ïa u Vipin Raghuvanshi la khot bishar mynta ka sngi. Ka jingshim bishar kam pat dei satia, kan nang shim ïa ka por. Kiwei, ynda la dei ka pali, kin sa hap ba wan,” ong u Gautam.
“Ka jingbishar kala sdang da ka jingpynwandur ïa ka charge-sheet. Mynta ka sngi ka jingbishar ïa ki sakhi kala sdang. Ha ka charge-sheet ki don kumba 90 ngut ki nongsakhi. Ka charge-sheet, nga kwah ban ong, ka dei kaba khlaiñ bha,” u la bynrap.
U Vipin Raghuvanshi, uba ai ka jingmudui u la pynpaw “Namar ba ka por kala kut noh mynta ka sngi, la buh por biang ha kawei ka sngi, kata ha ka 26 tarik Naiwieng. Namar ka jingduna ka por, ym shym la lah ban shim jingthoh ïa baroh ki jingbatai jong nga (statement)”.
Kane ka mukotduma ka dei halor ka jingshah pynïap u Raja Raghuvanshi ha ka jingwan ‘honeymoon’ sha Meghalaya ha u bnai Jymmang.
Ïa ka metïap la lap na ka riat marjan ka Kshaid Wei Sawdong myn ha ka 2 tarik Jylliew bad ki pulit ka thanad Sohra kila aiti ïa ka charge-sheet kaba don haduh 790 sla.
U Superintendent of Police ka East Khasi Hills Bah Vivek Syiem u la pyntip ba ka jingpynkhreh ïa ka charge-sheet kaba ar kala ïaid shaid-shaid bad la khmih lynti ban sa aiti noh sha ïingbishar ha ka taïew ba lai jong u Naiwieng.
