New Delhi, Naiwieng:
Ka Indian Embassy ha Thailand ka la pynbna khubor ha ka lah sngi U Blei ba ki don 197 ngut ki nong India kiba la wanphai sha India na Mae Sot, Thailand, da ki ar tylli ki liengsuiñ ba kyrpang ba la pynïaid da ka tnat Indian Air Force (IAF).
U Anutin Charnvirakul, Myntri Rangbahduh jong ka Thailand, u la leit jngoh ïa ka Mae Sot ha ka por nohphai sngi ban peit ïa kane ka jingpyntreikam, la ong ka Indian Embassy. Shuh shuh ka la kdew ba u nongmihkhmat jong ka Ri India ha Thailand u Nagesh Singh u la ïakynduh ïa u ha kad liengsuiñ.
“U Myntri Rangbahduh u la pynpaw ïa ka jingsngewnguh kaba khraw jong ka Thailand ïa ka jingpyrshang jong ka sorkar India ha kaba pynphai kloi ïa kiba shah kem na Mae Sot, bad pynthikna ïa ka jingïatreilang kaba bteng na ki bor synshar Thailand ha kaba pynsuk ïa ka jingwanphai ïa ki nong India kiba la shah pyllait hadien ba ki shahkem halor ki jingpyntreikam beaiñ jong ki ha bun tylli ki jaka kiba don ha Myanmar”, la ong ka khubor jong ka Embassy.
Ka la pynpaw ba baroh arliang ki la pynskhem biang ïa ka jingangnud jong ki ban ïakhun pyrshah ïa ki kam runar ba ïaid shabar ri, kynthup ïa ki kam thok ha ka Cyber bad ka jingkhaïi briew ha ka thaiñ, bad ban pynkhlaiñ ïa ka jingïatreilang hapdeng ki tnad ba dei peit ha baroh arliang mamla na ka bynta kane ka jingthmu.
Kat kum ka khubor jong ka Indian Embassy, la ong ba ki nong India kiba la shah beh mynta ka sngi ki dei kiba la set ha Mae Sot hadien ba dang shen ki la wan rung sha Thailand na Myawaddy, Myanmar, ha kaba la kynnoh ba ki dei kiba trei ha ki Cyber Scam Centre.
Kine ki briew ki la shah kem ha ki bor synshar jong ka Thailand namar ba ki la pynkheiñ ïa ki aiñ jong ka ri Thailand haba ki la rung beaiñ sha katei ka ri.
“Ka Embassy jong ka ri India, Bangkok bad ka Consulate jong ka Ri India ha Chiang Mai, ha ka jingïatreilang bad ki tnad treikam bapher bapher jong ka jingsynshar syiem, ha Thailand, ki la pynsuk ïa kane ka jingpynphai biang sha la ka jong ka ri. Kane ka dei shi bynta jong ka jingpyrshang ba bteng jong ka sorkar India ban pynthikna ïa ka jingshngaiñ bad jingbit jingbiang jong ki nong India katba ki dang don ha ka jingeh jong ki nongshong shnong shabar ri.” Ki nongpyntreikam nabar ri, bad peit bniah ïa ki jingjia ba la dep jong ki nongpynrung kam bad ki kompeni shwa ban shim ïa ki jingtyrwa kam shabar ri”, la ong ka Embassy ha ka rynsan X.
Ka la pynpaw ruh ba ka jingrung khlem da donkam visa sha Thailand na ka bynta ki nongbat passport na India ka long tang na ka bynta ki kam jngohkai pyrthei bad ki kam khaïi ba shipor, bad ym dei ban pyndonkam bakla na ka bynta ban shim kam ha Thailand.
