Shillong, Naiwieng 11
Ka Meghalaya Police F.T ka la kiew kyrdan biang sha ka Shillong Premier League (SPL) hadien ba ka la lah ban pynliem noh ïa ka Nongthymmai da 5-0 kol ha ka lympung ïalehkai First Division 2025 ba la pynïaid da ka Shillong Sports Association (SSA) ha ka lah sngi U Blei ha SSA Stadium kaba ha First Ground, Polo.
U Pynshailang Lyngkhoi u la khur da ka hat-trick hadien ba u la ïoh ban thep ha ka minit kaba 7, 48 & 53, katba ïa kiwei pat la pynbud da u Everestarly Rynjah (9) bad u Bikram Chettri (35).
Watla ka Nongkseh ka la bat ïa ka kyrdan ba hakhlieh, hynrei ka MLP ka la wan ha ka kyrdan ba-ar ha ka First Division mynta ka aïom, na ka bynta ban wanphai biang sha ka SPL na ka bynta u snem 2026 hadien ba ka la shah pynhiar kyrdan ha u 2018.
Ha kajuh ka por ka MLP bad ka Nongkseh kiba la kamai mar 24 poiñ, kin ïashim bynta ha ka SSA Champions Cup 2025 hadien ba la kut ka First Division.
Ha kawei pat ka jingïakhun, ka Mawkhar ka la pynliem noh ïa ka Nongkrem da 2-0 kol na ka bynta ban pynskhem ha ka First Division. Ïa kine la thep da u Rikyshan Warjri (30) bad u Vobisterfield Marngar (54).
Haba phai sha ki jingïakhun ha ka sngi Ba-ar hapdeng ka Nongrah bad ka Pohkseh ki la ïakhaid mar 2-2 kol.
U Mark Wanswett (43) u la pynkhih jar nyngkong na ka bynta ka Pohkseh, hynrei u Mebatskhem Lyngkhoi (45+1) u la lah ban pynïakhaid kylla na ka bynta ka Nongrah. Hadien ba la bteng ïa ka kylla step u Reinjoywell Wartde (73) u la thep kol biang na ak bynta ka Pohkseh hashwa ba u Mebatskhem (78) un pynphai kylla na ka bynta ban pynïakhaid ïa ka Pohkseh.
Ha kawei pat ka jingïakhun kaba la long kham hashwa, ka Mawtawar SC ka la pynliem noh ïa ka Lawsohtun SC lyngba ka shi kol ba la thep da u Aldo Mac Nongneng (33).
Ka jingïalehkai ha ka sngi Balang kan long hapdeng ka Nongthymmai bad ka Nongkrem ha ka por 1:15 mynsngi.
