Shillong, Naiwieng 11
Ki Nongïalam Shnong ka Shnongpdeng ha West Jaiñtia Hills ha ka sngi Ba-ar ki la leit ban jurip ïa ka jingshna ïa ka surok ban tip ïa ka daw jong ka jingpynjakhlia bad pynsniewdur ïa ka wah Umngot.
U Secretary ka Shnongpdeng u Bah Dapbor Syngkrem haba kren sha ki lad pathai khubor u la ong, na ka liang ka shnong kam pyrshah halor ka jingshna ïa ka surok ne ïa ki kam pynroi hynrei ki leit ban peit bniah ïa kiei ki daw kiba la mih na ka jingpynjakhlia ïa ki wah.
U Bah Dapbor u la ong ba ha kane ka jingjurip ki la lap ba ki nongtrei ki buh ïa ki pipe um ba heh ban tongum na kawei ka wahduid ba don hajan hynrei ynda ki la dep tongum kim lum shuh ïa kitei ki pipe kaba pynlong ba ka um kan tuid ryngkat ka khyndew sha ka wah Umngot.
U la ong ba katei ka jaka kam don eiei bad ka jingtih surok kumta u la kyntu ïa ka Sorkar bad ïa ki bor ba dei khmih ba ki dei ban pynkhuid noh ïa katei ka jaka.
U la ong ba ka thaiñ ka ju kamai na ka kam jngohkai lyngba kane ka wah kaba khuid bad ba sngur hynrei na ka jingleh torti ka la pynlong ka jingpynsniew dur ïa ka wah. U la ong ba ka dei ka kolshor jong ki trai shnong ba kin im ha ka wah kaba khuid bad ba sngur hynrei lada la pynjakhlia noh ïa ka, ka long kaba ktah haduh katta-katta ïa ki.
