Shillong, Naiwieng 12
Hapdeng u bnai ïaiong bad Nailur mynta u snem tang ha East Khasi Hills District ki don haduh 53 ngut ki khyllung kiba la ïap tang mar shu kha, na ka daw jong ka jingpang ‘Pneumonia’
Ïa kane la pyntip da ka Dr. EL. Kharmutee District Maternal & Child Health Officer ha ka sngi Balang ha ka jingkren sha ki lad pathai khubor ha ka jingpynbna ban sdang ïa ka program ïalap paidbah lane ka Socials Awareness and Action to Neutralize Pneumonia Succesfully halor ka phang “Newborn Safety-every touch, every time, every Baby”.
Ka Dr. Kharmutee ka la ïathuh ba ka jingsdang ïa kane ‘Campaign’ ka long ban shimkhia mardor ha ka ban pynduna ïa ka jingïap ki khynnah na ka jingpang ba ktah ïa ki tor lane kaba la ju tip ka ‘Pneumonia’bad kane ka Campaign ka sdang naduh ka 12 tarik u Naiwieng 2025 bad kan kut haduh ka 28 tarik u Rymphang 2026.
Ka Dr. Kharmutee ka pynpaw ba ka jingpang ‘Pneumonia’ ka dei ka daw bah ba ki khyllung ki khlad. Kumta kala kyntu ïa ki paidbah khamtam ïa ki longkmie ba kim dei ban pynsum ïa ki khyllung ba dang shu kha bad ka la kyntu ba dei ban shu ñiad da ka jaiñ kaba khuid. Kumjuh ka la kyntu ïa ki longkmie ba kin shim ïa ki lad jingïarap ka Sorkar bad ban leit sha ki jaka sumar (Hospital) ban kha khyllung ban lait na ka jingjia ba sngewsih.
“Ngi kwah ba kan nym don shuh ka jingkhlad ki khyllung ha ka Jylla jong ngi namar kane ngin sdang da ka program Socials Awareness and Action to Neutralize Pneumonia Succesfully halor ka phang “Newborn Safety-every touch, every time, every Baby” ban ïalap paidbah, kumno ban sumar ïa ki khyllung ba dang shu kha” la ong ka Dr. Kharmutee.
Ka Dr. Kharmutee ka la kyntu ruh ïa ki paidbah ha ki thaiñ nongkyndong ban kiar ban bah khyllung ha ka por shet jingshet khamtam lada ki pyndonkam ban shet jingshet da ka rnga ne diengïap. Nalor kane ka Doktor ka kyntu ruh ïa ki longkpa ban ym dih duma ne sikret hajan ki khyllung namar ka jingïoh ring mynsiem ki khyllung ïa ka tdem ka ktah ïa ki tor bad kaba buh jingma ïa ka jingim ki khyllung.
