Shillong, Naiwieng 12
Ki trai jong ka jaka ba la tei ïa ka Nongur Weilyngkut PHC ha ka sngi Balang ki la khang tala noh ïa ka PHC na ka daw ba ka tnat ka koit ka khiah ka la weng kam ïa kawei na ki khun jong katei ka longïing kiba la ai jaka sha ka tnat ban shna ïa ka PHC.
Na ka liang ki bahaïing hasem ha kane ka sngi ki la bthah ïa baroh ki nongtrei bad ki paidbah kiba wan shim dawai ban mih noh khnang namar kum ka ïing ki la shim ïa ka rai ban khang noh shuwa tad haduh ba ka Sorkar lyngba ka tnat ka koit ka khiah kan pynurlong ïa ka jingdawa jong ki.
Haba ïakren bad u Bah Kdtor Jana u la ong, ka tnat ka la ka pynkheiñ ïa ka soskular kaba ki la ïasoi ha ka 21 tarik Jylliew, 2017 hashwa ban plie ïa katei ka jaka sumar.
U la ïathuh ruh ba ïa ka kam chowkidar ka kam kaba ka hynmen jong u, ka Kong Aidolin Jana ka ju trei ha ki por ba la dep mynta la wan trei da uwei pat.
Na ka liang ki trai jaka ki la pynpaw ba katba ym pat lah ban pynbeit ïa kane kin khang shwa ïa kane ka jaka sumar tad haduh ba la thung kam biang ïa ka Kong Aidolin kaba la shah weng mynta la lai bnai shiteng.
Na ka liang ka Kong Aidolin Jana haba kren ka la ïathuh ba ha u bnai Jylliew ka la ïoh ïa ka shithi ba la weng kam ïa ka, bad khlem kino-kino ki daw kiba biang.
Ka Kong Jana kala ïathuh ba ïa katei ka jaka ki la shu ai ei sha ka tnat ka koit ka khiah bad da ka jingïateh ban ai kam ïa ar ngut kiba ha ïing jong ka, hynrei ka Sorkar ka ibeiñ ïa ki da kaba weng kam bad pynkheiñ ïa ka soskular kaba ki la ïateh. Kum ki trai jaka ki don hok ban shim biang ïa la ka jong ka jaka lada ka tnat ka pynkheiñ ïa ka soskular.
Kane ka Nongur Weilyngkut PHC ka ai jingshakri ïa ki 23 Sordar Shnong, ha kaba man ka sngi da ki phew ngut ki ju wan shim dawai na kane ka jaka bad ka jingkhang ïa kane ka jaka sumar kan long ka jingduhnong kaba khraw ïa ki paidbah.
