Shillong, Naiwieng 12
Ar ngut ki briew kiba kynthup ïa kawei ka longkmie ki la shah thombor da ka wait ha uwei u briew, kaba la jia ha West Jaiñtia Hills.
Katkum ka khubor kaba la ïoh na ki pulit la ong ba ha ka 10 tarik mynta u bnai, uwei u briew ba la tip kyrteng kum u August Pohleng (29 snem) uba na ka shnong Syndai Kmai Shnong ha West Jaiñtia Hills u la thombor ïa ki ar ngut ki briew kiba la tip kyrteng kum u Let Pohleng (31 snem) bad ka Kong Anxious Suliang (38 snem) da ka wait ha West Jaiñtia Hills.
La ong ba ha kane ka jingshah thombor, kitei baroh ar ngut ki briew ki la mynsaw bad la pynkit noh ïa ki sha PHC ha Pdengshakap bad nangne la bthah ban pynkynriah noh ïa ki sha ki jaka ai jingsumar ba kham heh.
Ha kaba ïadei bad kane ka kam thombor, na ka liang jong ki pulit ki la kem noh ïa utei u briew uba la kynnoh donkti ban thombor ïa kitei ki ar ngut.
