Khliehriat, Naiwieng 12
Ka Shilliang Umshong SC ka la khur jingjop, katba ka Rymbai Shken-shynriah SC bad Diengshynrum SC ki la ïasam mar shi poiñ ha ka lympung ïalehkai Super Division Foot-ball Tournament (5th Kyrmen Shyl-la Contribution Trophy 2025) ba la pynïaid da ka East Jaiñtia Hills District Football Association (EJHDFA).
Ha kane ka jingïakhun kaba la long ha ka sngi Balang ha madan artificial turf Diengshynrum kaba ha Khliehriat, ka Shilliang Umshong SC ka la pynliem noh ïa ka Dhana CSC da 3-1 kol.
Ïa ki kol ka Shilliang Umshong la thep da u Lhunminthang Thou-thang tang hapoh 2 minit, kumjuh u Besterly Ksih (48), bad u Intelligent Rymbai (90+1). Na ka liang ka Dhana ka la pynphai kylla shi kol lyngba u Dibok Lawai (50) hashwa ba kan mad ïa ka jingshah rem.
Haba phai sha kawei pat ka jingïalehkai kaba bud hapdeng ka Rymbai Shkenshynriah SC bad Diengshynrum SC ki la kut ha ka jingïakhaid hadien ba ym shym la don ba lah ban thep kol.
Haduh kaba kut ka jong ka wat kaba san, ka Sutnga SSCC ka la bat ïa ka kyrdan ba hakhlieh da kaba kamai 12 poiñ, katba ka Rymbai Shkenshynriah SC kala wan ha ka kyrdan ba-ar bad 11 poiñ. Ka Diengshynrum SC ka la wan balai da kaba kamai 10 poiñ, bud sa ka Shilliang Umshong SC ha ka kyrdan basaw bad kamai 7 poiñ. Kumjuh ka Thangskai Tiger SC kaba long ka lahduh jong u snem ba la lah, ka la kamai tang 7 poiñ. Ka Ladrymbai B SC kaba la wan ha ka kyrdan ba shatrai ka la kamai tang shi poiñ bad ka la thikna ban shah pynhiar kyrdan noh na kane ka lympung.
