Shillong, Naiwieng 12
U Chief Executive Member (CEM) ka Khasi Hills Autonomous District Council (KHADC), Bah Winston Tony Lyngdoh ha ka sngi Balang, u la ïakynduh ïa u Symbud Myntri Rangbah, Bah Prestone Tynsong bad aiti ïa ka dorkhas ba kyrpad ba un tuklar ha ka ban pyllait noh mardor ïa ka bhah khajna ba sahteng ka Council na ki marpoh khyndew ba long T.50 klur.
Haba kren sha ki nongthoh khubor hadien ka jingïalang, u CEM u la pyntip ba u Bah Prestone u la kular ban sa khmih ïa kane ka kam bad tyrwa ïa ki katto katne ki jingai jingmut ban pynjanai ïa ka jingïaid ka pisa tyngka, haba kyntu ban ïatreilang bad u Secretary bad Joint Secretary ka tnat District Council Affairs (DCA).
Halor ka jingtyrwa ka Sorkar ban siew ïa ka tulop sha ki nongtrei ki ADC, u CEM u la ong ba ha ka jingïalang bad ka Deputy Commissioner bad ki ophisar ba dei khmih, u la pynpaw ba ïa ka jingai jingïarap song pisa-grant ne kiwei-kiwei ba la mynjur ïa ka GHADC dei ruh ban ai lang sha ka KHADC.
“Lada ka Sorkar ka pyllait ïa ka bhah jong ngi ha ka por kaba dei, ka KHADC kan nym don jingeh ban pynthikna ïa ka jingtreikam ba ïaid beit ïaid ryntih ha ka Council,” u la bynrap.
U ong ba u Symbud Myntri Rangbah lehse u la ïoh pdiang ïa ka kaiphod jong ka Sub Committee (kaba la bynshet ïa ka kam ban ïakren bad ka KHADC halor ka jingtyrwa ka Sorkar), hynrei ma u dalade um pat shym la ïoh satia ïa ka.
U la pyntip ba ka bhah khajna ba dei ban ïoh ka KHADC na ka Sorkar ka long T.60-70 klur, hynrei T.20 klur la dep pyllait dang shen, kaba pynsahteng sa kumba T.50 klur.
“Lada ka Sorkar ka burom ïa kaei kaba ka dei ban siew, ngi lah ban pynthikna ïa ka jingtreikam kaba ïaid beit ïaid ryntih ha ka Council,” u la ong.
Halor ki jingeh ba ïakynduh da ki MDC na ki konstitwensi ha ki jaka sor, u CEM u la ong ba ha ka jingïalang, u Bah Prestone u la kubur ïa ka jingeh bad pyntip ba un sa lum ïa ka jingïalang bad kine ki MDC ban pynbeit ïa kine ki jingeh.
U CEM u la pynpaw ba ka jingeh ka mih na ka kyndon ba pynthymmai bala buh da ka 15th Finance Commission, kaba lah jan kut artad ka samoi jong ka.
U Symbud Myntri Rangbah u la kular ba ka Sorkar kan sa pan ïa ki jingtyrwa beit-beit na ki MDC jong ki konstitwensi ba don ha ki jaka sor.
