Shillong, Naiwieng 12
Ha ka miet jong ka 10 Naiwieng, 2025, ki pulit ka Anti Narcotics Task Force (ANTF) ki la ïoh kurup ïa u drok na ki ar ngut ki briew ha ISBT Mawiong.
Kane ka jingïoh kurup ka dei lyngba ka jingïoh jingtip ba thikna ba ki don kiba suba khaïi drok, kumta ka ANTF ka la pynlong ïa ka jingtalasi kali ha kaba ki la ïoh ban pynsangeh ïa kawei ka arshaka kaba don ïa u registration number ML05-AE-4379 kaba wan na Guwahati bad thmu ban kiew sha Shillong, kaba la ñiah da u Ajit Kumar Rai bad ba la shong ryngkat da u Gulshan Singh.
Haba la talasi ïa kine ki ar ngut, la lap ïa kawei ka synduk sabon ba don ïa u mar beaiñ na u Gulshan Singh bad 39 tylli ki dawai kuli Nitrazepam na u Ajit Kumar Rai.
Haba la peit bniah ïa kine ki mar beaiñ la pynthikna ba u dei u heroin uba don ka jingkhia kaba 17.22 gram.
Ïa kine baroh arngut ki pulit ki la kem noh bad la pynngat ïa ki hapoh ki kyndon ka NDPS bad ka jingtohkit ka dang ïaid shakhmat.
