Shillong, Naiwieng 12
Ka Working President ka Congress, ka Deborah Marak, ha ka sngi Thohdieng ka la pyntip ba ka Congress ka pynkhreh bha ban pynkhlaiñ ïa ka seng, da kaba kdew ba ki don ruh katto katne ki nongïalam kiba kynthup na ka TMC ki la khreh ban pynïasoh bad ka Congress.
“Ki don shibun, ki ban wan pynïasoh uwei hadien uwei. Kumta ngi la long kiba la khreh. Ki don kiba don ha ka politik hynrei ngim pat lah ban ïathuh. Hynrei ynda la dei ka por ngin sa ïathuh” la ong ka Deborah.
Haba kylli ba la ki MDC jong ka TMC kin pynïasoh bad ka Congress, ka lah ong “ki lah ban don ha ka jingïakren bad shen ki lah ban wan pynïasoh bad ka seng”
U Secretary ka MPCC u Bah Manuel Badwar u la ïathuh ïa ka jingpynkhreh ka Congress haba ïadei ka ilekshon ha GHADC. Ha kaba u la pynpaw ba, ka dei ka mon jong ki paidbah ba bun ba lang bad kyrmen ba kin wan sha Congress bad kan khie-im biang.
U la ong ba ka Congress ka la mad ïa ka jingkrenbeiñ, hynrei u kyrmen ba ki paidbah kin sa pyni ïa ka jingkylla ka ban sa long sha kawei pat ka lynti.
U la ong ruh ba, katba dang bun kiba kwah ban pynïasoh bad ka seng, ka seng kan pyndonkam ïa ka jingstad jong ka, da kaba u la ong ba, kam mut ba baroh kin lah ban ïasoh sha ka Congress hynrei ka hap ban jied, da kaba peit ïa ki jaid briew kiba kwah ban ïasoh tang ban shim kabu ne ki dei kiba don jingmut shisha ban pynkhlaiñ ïa ka Congress. U la kdew ïa ka jingrung u Zenith Sangma dang shen, da kaba ong, “U Zenith Sangma u wan pynïasoh da ka mon ba laitluid jong u ba u dang don jingieid ïa ka Congress bad ïa ki jinglong kiba kum kita ngin sa peit thuh bha.”
