Nongpoh, Naiwieng 12
U Myntri Khynnah jong ka Sorkar Pdeng ba dei khmih ïa ka tnat Consumer Affairs, Food and Public Distribution u BL Verma u la pynpaw ïa ka jingsngewhun halor ka jingpyntreikam ïa ki skhim pynroi bapher-bapher kiba la mang kyrpang lyngba ka Sorkar Pdeng lyngba ka ‘Aspirational District programme’.
Haba kren sha ki lad pathai khubor ha ka sngi Balang hadien ka jingïalang bad ki heh ophisar ka Ri Bhoi, u Myntri Khynnah u la ai ruh ka jingïaroh ïa u Myntri Rangbah ka Jylla, u Conrad K Sangma, ba dei hapoh ka jingïalam ka jong u, ka Jylla ka la nang kiew shaphrang ha baroh ki liang jong ki kam pynroi.
U BL Verma u la ïathuh ruh ba u Myntri Rangbahduh ka Ri, u Narendra Modi u don ïa ka jingsngewkhia jur na ka bynta ban kyntiew ïa ki Jylla ka thaiñ Shatei Lam-Mihngi, bad dei halor kata ka nongrim ba u la wan ban ïuh kjat hi dalade la bunsien ban khmih bniah bad theh ïa ki kam pynroi.
U la ong ruh ba na ka liang ka jong u, u dap da ka jingsngewhun halor ka jingshimkhia ka Sorkar Jylla ban pyntreikam bha ïa ki skhim pynroi Aspirational District ha Ri-Bhoi bad pynpaw ïa ka jingkular ba ka Sorkar Pdeng kan ïai trei ryngkat-ryngkat bad ka Sorkar Meghalaya ban pynkylla pat ïa ka Meghalaya kum ka Jylla kaba bit ba biang ha baroh ki liang bad kyntu ruh ïa ki ophisar ba ki dei ban pyntrei hok bad pyntrei bha ïa ki skhim kiba ka Sorkar kala mang kyrpang khnang ba ki paidbah kin ïoh ïa ka jingmyntoi kaba ki dei hok ban ïoh.
Ha kane ka sngi, la sakhi ruh ïa ka jingdon ryngkat jong u MLA ka Nongpoh, u Bah Mayralborn Syiem, u Deputy Commissioner ka Ri Bhoi, u Abhilash Baranwal nalor kiwei-kiwei de ki heh ophisar ka district bad ruh na ki tnat treikam bapher-bapher.
Kum ban shu kdew, u BL Verma ha ka jingwan ïuh kjat hynnin ka sngi, u la ïoh ban leit jurip ïa kiba bun ki jaka kiba la pyntreikam ïa ki skhim Aspirational District ka Sorkar Pdeng, ba kynthup ïa ka One Stop Centre ha Nongpoh, ka Fair Price Shop ha Mawtnum, ka Umdihar Food Processing Unit bad ruh ïa ka Umroi Health and Wellness Centre.
