Shillong, Naiwieng 12
Ka Congress ka la pan ïa ka jingïatreilang jong ki Dorbar Shnong haba ïadei ka rukom pynrung kyrteng thep vote, da kaba kdew ba kan ïarap ban tehlakam ïa ka jingpynrung tuh ïa ki nongthep vote ki bym dei hok bad ban pynthikna ïa ka thup thep vote kaba khuid ha Meghalaya.
Haba kren sha ki nongthoh khubor, u Secretary jong ka Meghalaya Pradesh Congress Committee (MPCC) u Bah Manuel Badwar u la ong ba, ha ka jingïalang ba dang shen bad u Chief Electoral Officer (CEO) ki la ïoh ban ïakren haba ïadei bad ka ‘Special Intensive Revision’ (SIR) namar ba hangne kam don ka jingsynshar Panchayati Raj, kumjuh ruh ki la pynsngew ïa u heh ophisar ka Election Commission, ïa ka jingdonkam ban ai bor shuh-shuh ïa ki Dorbar Shnong.
Nalor kane u la ong, ïa kane ka jingai jingmut, ki la don ruh kiwei pat ki nongmihkhmat ba na kiwei ki seng kiba la kyrshan, ba dei ban ithuh pura ïa ki Dorbar Shnong ha ki kyndon kiba ïadei bad ka jingpynrung kyrteng ïa ki nongthep Vote.
“U CEO u la kular ïa ngi, ba un shimkhia haba ïadei ban ai bor ïa ki Dorbar Shnong ban pynthikna ïa ka jingpynrung tuh ïa ki nongthep Vote bad kumta ter ter, ki bym dei hok ban long ki nongthep Vote, kim dei ban ïoh thep Vote ha Meghalaya.” ïathuh u Bah Manuel.
U Bah Manuel u la pynpaw, ki nongthep Vote kiba ïa kynriah jaka ha kylleng ki Jylla, da kaba kdew na ka jingïalap ilekshon u Rahul Gandhi, bad ai jingmut ba kum kine ki rukom leh ba da ka “bor pisa,” ki lah ban pynthut ïa ka rukom jied nongmihkhmat.
