Shillong, Naiwieng 12:
Ki nongrwai kiba pawnam ha ka pyrthei kiba kynthup ïa u Jason Derulo bad The Script ki la wan poi sha Shillong na bynta ban pynshongshit ïa ki paidbah kiba wan lehkmen ha ka tamasa Cherry Blossom ka ban sdang ha ka 14 bad 15 tarik Naiwieng mynta u snem.
Ka jingpynkhreh ïa katei ka tamasa Cherry blossom mynta u snem 2025 ha Nongbah Shillong ka la ïaid shaid-shaid ha Jawaharlal Nehru Stadium ka madan MFA bad SRTG ban pynheh shuh-shuh ïa ka jaka leh tamasa Cherry Blossom bad mynta ïa kine ki jaka ruh la pynkhreh shaid-shaid.
Ki nongrwai ban pynshongshit ha ka sngi sdang ha madan Polo ki kynthup ïa u Jason Derulo, u khlur rwai pop-R&B na Miami, USA, un wan ban pynshongshit da ki jingrwai ba paw bha jong u, kawei pat ka kynhun ïa kaba la tip kum ka The Script, kaba dei kawei na ki kynhun ba pawnam na Ireland, kan mih lang ha kane ka sngi ha ryngkat u Derulo.
La ïohi ba ïa ka madan Polo la pynbit pynbiang bha bad la siang bha ïa ka madan ban ïada ïa u phlang kumjuh ruh la pynkhreh bha ïa ka rynsan kaba heh na ka bynta ki nongrwai nongshad ha ka tamasa.
Nalor kitei ki nongrwai kiba la paw, yn wan rwai ruh ka kynhun Aqua bad Nora Fatehi.
Kumban shu pynkynmaw kane ka tamasa Cherry Blossom la ju pynlong kumba ar snem ha madan Kurkalang, Bhoirymbong, Ribhoi District hynrei mynta u snem ka Sorkar Jylla ka la rah noh sha JN Stadium Complex Polo.
