New Delhi, Naiwieng:
Arsngi hadien ka jingjia jong ka jingbthei kaba shyrkhei Red Fort Metro Station, kaba don ha Delhi, ki tyllong khubor ki ïathuh ba ka jingbthei ha kane ka jaka ka dei kaba don jingïadei bad ki jingthoh kiba pyrshah ba la lap ha ka thaiñ Nowgam ha Srinagar.
Ki ong ruh ba la ujor ejahar ha ka 19 tarik u Risaw ha kaba ïadei bad kane ka kam.
Ki tyllong khubor ki la pynpaw ruh ba ki bor pahara ki la shimkhia tyngeh ban pynpulom ïa ki kam bad ban pyntroiñ ïa ka kynhun Jaish-e-Mohammed hapdeng ki jylla kaba ïadei bad ka jingthmu thombor ki lehnoh.
Kumba la ïathuh da ka tnad pathai khubor, ha ka jingtohkit ïa kane ka kam, la ïoh ban kem arngut ki briew na Shopian bad Ganderbal hapdeng ka 20 bad 27 tarik Risaw bad ha ka 5 tarik Naiwieng. Napdeng ki arngut kiba la shah kem, uwei napdeng jong ki u dei u doktor uba la tip kyrteng kum u Dr Adil, ïa uba la kem na Saharanpur ha Uttar Pradesh, la ïathuh ka tyllong khubor.
Ki tyllong khubor ki la ïathuh shuh shuh ba hadien ar sngi, la ïoh kurup ruh ïa kawei ka suloi AK-56 bad kiwei kiwei ki tiar siat ha Anantnag Hospital. Shuh shuh, hadien la lap ruh ïa ki suloi, ki pistol, bad ki tiar pynbthei na kawei ka jaka ha Faridabad, ong ka tyllong khubor.
Ha ka jingtohkit, une uba shah kynnoh u la pynpaw ïa ki kyrteng jong kiwei pat ki briew kiba donkti ha kane ka kynhun thombor. Hadien kane la kem noh ïa u Dr Muzammil uba dei u doktor na Al Falah Medical College ha Faridabad, ong ka tyllong khubor. Halor kine ki jingtip ba bniah, la kem shuh shuh ïa kiwei pat kiba shah suba donkti, bad la kurup ïa ka jaka buh tiar bad ki tiar pynbthei kiba bun, la ïathuh ka tyllong khubor.
Haba pynkut noh ïa ka jingbeh thong, ha ka 9 tarik u Naiwieng, uwei u briew ïa uba la tip kyrteng kum u Madrasi, uba sah ha Dhauj, Faridabad, u la shahkem na ka ïingsah jong u.
Ha ka sngi kaba bud, kata ha ka 10 tarik Naiwieng, la ïoh kurup ïa ki tiar pynbthei ba bun kiba baroh ki don ka jingkhia kaba 2,563 kilo, na ka ïingsah jong u Hafeez Mohammad Ishtiaq, uba shong basah ha Mewat bad uba dei u Imam ha Al Falah Mosque ha Dhera Colony jong ka Faridabad.
