Shillong, Naiwieng 12
Ka North Eastern Council (NEC) ka la pynbna ïa ka jingpyllait pisa bathymmai kaba haduh T.31.37 klur hapoh ki skhim bapher-bapher na bynta ka Jylla jong u bnai Risaw, 2025, kaba thmu ban pynsted ïa ki jingtei bad ka roi ka par ha kylleng ka Thaiñ Shatei Lam Mihngi.
Ban pyntikna ïa ka jingpyntreikam kaba beit ba ryntih haba ïadei bad ki kam pynïasoh surok, ka NEC ka la pyllait haduh T.22.90 klur hapoh ka NESIDS (Road) na bynta u bnai Risaw, 2025, bad na kane, T.17.90 klur ka long na ka bynta ban pynbha ïa ka surok Borkhat-Sonapur (L-39.59 Km) bad ka pisa kaba T.5.00 klur ka long na ka bynta ban shna ïa ka jingkieng heh kaba kynthup ïa ki lynti ïaid ba mardor halor ka Wah Umngot ha ka surok Jongksha-Kharang-Diengleng-Nongjrong- Moodymmai-Wahiajer (kaba jrong 0.11km).
Ka NEC ka la pynbna ruh ïa ka jingpyllait pisa ba kongsan kaba kot sha ka T.8,46,66,608 na ka bynta ki projek pynroi bapher-bapher ha ka Jylla jong u bnai Risaw, 2025, kaba pynskhem ïa ka jingkut jingmut jong ka Sorkar ban pynsted ïa ka roi ka par bad ka jingpynroi ïa ki jingtei ha ka Thaiñ Shatei Lam Mihngi.
Ki projek ki kynthup ka jingkyrshan ïa ka kor (1.5T) MRI ha Tura Civil Hospital, Meghalaya – T.5,01,75,000, ka jingtyrwa ïa ka ‘Identified Block’ na ka bynta ban pynbiang ïa ki jingshakri ba kongsan ba la pynithuh hapoh ka 30 PC Component ha Mawshynrut C&RD Block Meghalaya – T.94,50,000, North East Student Program for Awareness, Reach and Knowledge on Space (NESPARKS) – T.1,15,12,000, Rural Eco Tourism ha Ri-lum Garo (East Garo Hills, West Garo Hills and South West Garo Hills) Meghalaya – T.31,29,608, ka jingtei ïa ka Seiñraij Jowai Community Hall-cum-Recreation Centre Building ha Dulong, West Jaiñtia Hills District, Meghalaya – T.1,04,00,000.
