Shillong, Naiwieng 12
Ka kynhun ki ‘thei ïalehkai ka Jakrem ka la long ka lahduh ha ka lympung ïalehkai Meghalaya Women’s State League 2025 ba la pynïaid da ka Meghalaya Football Association (MFA), hadien ba ka la pynliem noh ïa ka Na Rympei Football Academy da 2-1 kol ha ka sngi Balang ha SSA Stadium, First Ground, Polo.
Ha kane ka jingïakhun final ka Na Rympei FA kaba la lah ban tam shakhmat da kaba thep shi kol ha ka minit kaba 14 lyngba ka Pynhun Shulet, hynrei ha ka minit kaba 58 ka Jakrem ka la ïoh ïa ka kabu ksiar ban pynphai na ka daw ka jingbakla hapdeng ki ‘thei ïalekai ka Na Rympei FA, bad ïa ka kol kaba ar ka Jakrem ka la thep lyngba ka Ïaphisha Marbaniang ha ka minit kaba 72, kaba la biang pura ïa ki ba kin leit phai sha la ïing ryngkat bad ka nam lahduh jong kane ka lympung.
Ka Jakrem kaba dei ka kynhun kaba la mihkhmat na ka Mawkyrwat District Sports Association, bad da kane ka nam jop kan pynsah nam pat ïa ka, kum ka kynhun ki ‘thei ïalehkai ba nyngkong ha ka Jylla ban rah ïa ka nam lahduh ha kane ka lympung ïalehkai phutbol kaba kyrpang jong ki kynthei, ïa kaba la kyrshan lang da ka tnat ïalehkai.
U kongsan ba la wan ban sakhi ïa kane ka jingïakhun final ki long u Principal Secretary Bah Frederick Roy Kharkongor (IAS), kumjuh u Assistant Director ka tnat ïalehkai Bah Païa B War Nongbri kum u symbud kongsan, kumjuh ki nongïalam ka MFA ba kynthup ïa u President Bah Hamletson Dohling, Secretary Bah Sunesh Syiem bad kiwei.
Hynrei kaba kham pynshong shit bad ai mynsiem ïa kane ka jingïakhun ka dei ruh ka jingwan ban ïa kyrshan bad ai mynsiem da ki paid nongkyrshan jong baroh artylli ki kynhun.
Ïa ka nam Player of the Final la rah da ka Ïaphisha, katba ka nam Player of the Tournament ka leit sha ka Sunalinda Ïawren, ka Golden Glove ka leit sha ka ‘thei apkol ka Mawlum Tyrsad ka Ïonaris Khongsit, katba ka nam jong ka Golden Boot ka leit sha ka Ïaraplang Nongrum hadien ba ka la thep haduh 21 kol ha kane ka lympung.
Lyngba kane ka nam jop, ka Jakrem ki la ïoh rah ïa ka song pisa kaba T. 2 lak tyngka, ryngkat ki takma bad ka trophy, katba ka Na Rympei FA ka la ïoh T. 1 lak tyngka lem bad ki takma.
