Imphal, Naiwieng:
Ki pulit ka Manipur ki la kem ïa saw ngut ki dkhot kiba trei shitom jong ki kynhun pyntriem ba la shah ñiew beaiñ kiba donkti ha ki kam dawa pisa ha kylleng ki distrik jong ka jylla.
Ha ka 10 tarik, Naiwieng, ki pulit ki la ïoh kem ïa u Thongam Anand Singh ba la tip ruh da ka kyrteng kum u Eku (33) uba la khot ïalade kum u Sergeant Major jong ka kynhun PREPAK (PRO) na ki jaka sah jong u ha Sekmaijin Thongam, kaba hap hapoh Mayang Imphal Police Station, Imphal West distrik. La kynnoh ba u Singh u dei uba donkti ha ki kam dawa pisa ha Kakching distrik. Na ka kti jong u la ïoh kurup ïa kawei ka mobile phone kaba la pyndonkam ha katei ka jingpyntreikam.
Ha kane ka juh ka sngi la ïoh ban kem biang ha kaba ka kynhun ki pulit ki la kem ïa u Thokchom Bijoy Singh ba la tip da ka kyrteng kum u Bhopen, Bike, Tayai, Kheda (56) uba la kam ïalade kum u Lance Corporal jong ka RPF/PLA na Yairipok Kakmayai Maning Leikai, ha ka thaiñ Thoubal. La ïathuh ba u dei u trai shnong na Thinungei Awang Leikai, ha Bishnupur distrik bad la ïathuh ba u dei uba donkti ban dawa pisa na ki nongtrei sorkar ha Bishnupur distrik. Ki pulit ki la ïoh kurup kawei ka mobile phone bad ar tylli ki sim card ha kane ka jingkhynra.
Haba bteng ïa kane ka jingkhynra, ha ka 11 tarik Naiwieng, ki pulit ka Manipur ki la ïoh ban kem sa arngut ki dkhot ba trei shitom jong ka RPF/PLA na la ki jong ki jaka sah jong ki ha Dibong Sanakhong kaba hap hapoh Jiribam Police Station, Jiribam distrik. Kitei ki briew kiba la shah kem ki dei kiba la tip kyrteng kum u Shantosh Boro (30) bad ka Hodam (O) Moromi Devi (31). Baroh arngut la kynnoh ba ki donkti ha ka kam dawa pisa na ki skul jong ki riew shimet.
