Washington, Naiwieng:
U nongrah ktien jong ka US sha India, u Sergio Gor, ha ka Sngi Ba-ar, u la ong ba u khmih lynti ban shimti ia ka kam thymmai jong u ha New Delhi bad u la ai khublei ia u President Donald Trump uba la ioh ia ka lad ban shakri kum u nongmihkhmat jong ka Washington sha kane ka ri.
U Gor, uba don 38 snem ka rta, ula pynsmai da u Vice President jong ka US, u J D Vance, ha ka jingialang kaba la pynlong ha ka Oval Office, ha ka Sngi Nyngkong. U Ambassador ka India sha US, u Vinay Mohan Kwatra, u la ai khublei ia u Gor, ba ula bam smai kum u nongmihkhmat ba thymmai jong ka United States sha India.
“Nga ai khublei shibun ia u @SergioGor ba u la bam smai kum u Nongmihkhmat jong ka U.S. sha India. Nga kitbok kitrwiang ia phi katba phi dang pynkhreh ban shimti ia ka kam jong phi ban long u nongrah ktien sha New Delhi,” u la ong ha ka Social Media ha ka Sngi Ba-ar.
Katba u President ka US, u Donald Trump pat, u long u nongpynïaid ïa ka jingïalang bam smai jong u Gor ha kaba la ïadon lang da u Minister of State- u Marco Rubio, u Myntri ka tnat pla tyngka- u Scott Bessent, nongïasaid aiñ ka US- Pam Bondi, nongïasaid aiñ jong ka US na ka bynta ka District of Columbia Jeanine Pirro, u Senator Lindsey Graham bad ka Erika Kirk, ka kurim jong u nongïasaid aiñ, u nongïakhih saiñ hima- sima.
Ka Senate jong ka US ha u bnai Risaw, ka la pynthikna ia ka jingpynieng ia u Gor kum u nongmihkhmat jong ka US sha India u ban sa long. Ha u bnai Nailar, U President Trump, u la pynieng ia U Gor, uba dang shakri kum u Director of Presidential Personnel, sha ka kyrdan Ambassador sha India bad kum u nongmihkhmat ba kyrpang na ka bynta ki kam jong ka South bad Central Asia.
U la ong ba u Gor un long u nongmihkhmat uba pawnam bad ba kongsan na ka bynta ka US. Ha ka jingbishar pynskhem jong u ha ka komiti ba ïadei bad ki bar ri jong ka Senate ha u bnai Nailur, u Gor u la ong ba ka India ka dei ka paralok ba kongsan kaba ka jingïaid lynti jongka kan pynwan dur ïa ka thaiñ bad shabar jongka.
U Gor u la ong ba u shimkhia ban kyntiew ia ka jingsngewtynnat jong ka America ha kane ka jingiatreilang kaba “kongsan”
