Shillong, Naiwieng 12
U Myntri ka tnad pule-puthi, Bah Lahkmen Rymbui ha ka Sngi Balang u la ong ba ka jingthmu “ba nyngkong bad ba hakhmat eh” jong ka Sorkar ka long ban pynbeit ryntih ïa ki skul ha kylleng ka Jylla.
Haba kren sha ki lad pathai khubor, u Bah Rymbui u la batai ïa ki jingthmu bad ong, “Ka thong jong ngi ka long ban pynbeit ryntih ïa ki skul – ban pyntikna ba ki don ïa ki nonghikai katkum ka jingdonkam, ka jingbiang ha ka liang ki khynnah pule, bad ki jingtei kiba bha.”
U la bynrap, “Nga kyrmen ba ngin poi sha ka kyrdan ha kaba baroh ki skul ha Meghalaya ki don ïa ki nonghikai kumba ki donkam, kaba plie lynti na bynta ki jingkylla ki ban pynkylla dur.”
Haba kren halor ki jingeh ki nongtrei hapoh ka Sarva Shiksha Abhiyan (SSA), u Myntri u la pyntikna ba ka Sorkar Jylla kan pynneh ïa ka skhim wat lada ka Sorkar Pdeng ka pynsangeh noh ïa ka, da kaba kdew, “Yn sa peit bniah ïa baroh… ka Sorkar Meghalaya kan sa peit ba kane ka skhim kan ïai bteng la ka long kumno-kumno.”
Haba kylli shaphang ka jingbei pisa, u Bah Rymbui u la ong ba ym pat lah ban tip ïa ka jingkheiñ kaba tikna.
“Ngim pat poi sha kata ka bynta ba katno ka pisa ka donkam. Ngi dang trei haba ïadei bad kane bad ngi kyrmen ban ïoh jingkheiñ ha kine ki khyndiat sngi ban wan. Nangta ngin sa bishar bniah ïa ka jinglut-jingsep jong man la ka jingpynkiew.”
U la pynpaw ruh ïa ki jingeh ha ka liang ka pisa-tyngka, da kaba ong, “Ka jingdon ki nonghikai ka long kaba bun bha… ngin shong bad ka tnad pla tyngka ban tip haduh katno ka Sorkar ka lah ban kit, da kaba buh jingmut ruh ïa kiwei pat ki jingkitkhlieh kum ki dawai ha ki hospital bad ki jingtei surok.”
Na ka liang u Bah Rymbui u la pynkut da kaba ong, “Ngin pyrshang ban leh hok ïa baroh.”
