Shillong, Naiwieng 13
U nongshna phlim ba paw ka Jylla, u Bah Pradip Kurbah u la shah pynkup burom da ka khusnam Best Director ha ka jingïakob Indian Compe-tition ha ka 31st Kolkata International Film Festival na ka bynta ka phlim ‘Ha Lyngkha Bneng’ (The Elysian Field).
Ïa kane ka phlim ‘Ha Lyngkha Bneng’ la shah jied ruh na ka bynta ka International Competition ha ka International Film Festival ha Kerala, ka ban sa wan bad kaba dei ruh kawei na ki tamasa ba pawnam jong ka India kaba don ïa ka jingïakop ha ka pyrthei baroh kawei.
Ka phlim ‘Ha Lyngkha Bneng’ ka la shah pynkupburom, namar ka jingjylliew bad ka jingpyni dur kaba itynnad ïa ka jinglong, ka jingkynmaw bad ka jingkylla ka mariang jong ka Meghalaya.
Ka jingpynïaid jong u Bah Kurbah, ka wanrah lang ïa ka jinglong ba kyrpang jong ka kolshor, ka jingpynïaid bad ka jingsngew ba khlaiñ ha ka jinglong briew man briew.
Haba pynpaw halor ka jingjop, u Bah Kurbah u la ong ba kine ki jingjop kim dei tang ki khusnam, hynrei ki long ki jingpynkynmaw ïa ka jingïaid kaba jngai, ka jingbym ïoh thiah ïoh dem, ki jingartatien, ki kam ba rit jong ka jingngeit bad ki briew kiba la don lang hajan jong u ban ïarap haba um don ei-ei.
U la ïasam ruh ba ïa ka ‘Ha Lyngkha Bneng’ la kha na ka jaka jong ka jinglong hok, jingïaleh bad ka jingieit.
U Bah Kurbah u la pynpaw ruh ka jingsngewnguh kaba khraw ïa ka Sorkar Meghalaya kaba ju ai mynsiem beit ïa ki kam shna phlim.
U la pynpaw ïa ka jingkyrshan jong u Myntri Rangbah ka Jylla, uba ka jingngeit jong u ha ka kam shna phlim ka la long ka mawjam kaba skhem ïa ki nongshna phlim ha ka Jylla.
Shuh shuh u la bynrap, ba da kane ka rukom kyrshan ka ban nangkiew, nangbun ki nongshna phlim na Meghalaya kin tyngshaiñ ha ki rynsan shna phlim jong ka ri bad ha ka pyrthei ha ki snem ban wan.
Da ka khusnam Best Director ha ka KIFF bad ka jingshah jied jong ka ha ka IFFK, ka ‘Ha Lyngkha Bneng’ ka pyni sa kawei pat ka mawjam kaba kongsan ym tang ha ka jingïaid lynti jong u Bah Kurbah, hynrei ka pyni ïa ka jingkiew ha ka rukom shna phlim jong ka thaiñ Shatei Lam Mihngi.
