Ka jingmih ka jingthoh ba dang shen shaphang ‘Ka Ri Bam Syiem’ ha ka jaka ïaid ka jingshna surok Pynursla bypass. Ka Ri Ban Syiem ka dei ka khyndew ba la ai da ki Raid ha ka por barim mynba ka syiem ka dang shong dang sah ha ka shnong Langkyrdem ban pynbam masi kulai. Kumta ka kyrteng Ri Bam Syiem ka dang sah ka khana pateng haduh kine ki sngi.
Namar kata u Syiem u la kren bad thoh shai ha ka shithi No .memo No.KS.97/NH.40/2020-25/50-51 dated Smit the 5th March 2025.
Ba ka kyntien Ri Bam Syiem ka long kaba la don lypa naduh mynshuwa. Hynrei ïa ka khyndew ka shyiap bad ka shynshar khadar kumba ka long naduh mynshuwa ka hap hapoh ka jingkhmih bad pynïaid ka ophis jong u Sordar bad ka Executive Committee jong u. U Syiem um juh tuklar ne mushlia ïa kata ka compensation ne bailutksan ba ïaid ka surok Pynursla bypass. Hynrei u pyrshang ban pynneh ïa ki Hok ki Riti kumba ju pynïaid ki longshuwa mynshuwa ban pynneh ïa ka jinglong trai ïa ka khyndew ka shyiap kaba dei ka khyndew jong ka Raid.
Namar kata ka khubor ba mih ha ka 21/10/25 ka long tang ban pynsngewthuh bakla ïa uba bun balang khamtam ïa u paidbah nongshong Raid. Ka jingrah lama ïong bad ka jingdawa hiar shuki ïa u Sordar ka long tang ban thad burom bad pynjah burom ïa ka kyrteng jong ka Raid Nongkhlieng.
Ka jingdawa hiar shuki ïa u Sordar ka dei ka kam tang ki katto katne ngut ba kwah shim kabu bad khwan myntoi shimet. Kine ki dei ki juh ki briew kiba la pyrshah ha ka por ba ïa jied Sordar ha ka snem 2022, la pynkut ka jingpynshai na u Sordar bad ka Committee jong ka Raid Nongkhlieng.
