Shillong, Naiwieng 13
Ka National Investigation Agency (NIA) ka la pynlong ïa ka jingkhynra kaba jur ha kiba bun tylli ki Jylla kynthup ruh ha South Garo Hills ha Meghalaya, ha kaba ki la hiar sha ka thaiñ Maheshkhola Rongra, kum shi bynta jong ka jingtohkit bad wad bniah halor ka kam suh buit pyntriem ha Gujarat jong ka Al-Qaida kaba kynthup ruh ïa ka jingdonkti jong ki nong Bangladesh kiba rung be-aiñ sha India.
Katkum ka tyllong khubor la ïathuh ba ki bor pulit ka Jylla kim pat don ïa ki jingtip kaba thikna hynrei la ong ba ha ka sngi Balang ki la wan sha South Garo Hills ban leit sha ka thaiñ Maheshkhola-Rongra bad ban leit phai pat ha kajuh ka sngi.
Katkum ka kyrwoh, ki kynhun ka NIA ki la pynlong ïa ki jingtalasi ha ki 10 tylli ki jaka kiba don ha ki san tylli ki Jylla kata ha West Bengal, Tripura, Meghalaya, Haryana bad Gujarat, da kaba rung sha ki jaka treikam jong kito ki riew shimet kiba suba jur ba ki don ka jingïadei. La ong ba ka NIA ka la ïoh ban kurup ruh bun tylli ki tiar digital bad ki kot ki sla bad ïa kiba la phah ruh sha ka tnat Forensic.
Katkum ka mukotduma kaba la rejistar ha u Jylliew, 2023 hapoh ki kyndon bapher jong ka Unlawful Activities (Prevention) Act, Indian Penal Code, bad Foreigners Act, ka la pynpaw ïa ka jingdon jingïadei bad ka Al-Qaida ha ki khappud.
Shuh shuh ka kyrwoh na ka NIA ka la pynpaw ba ki saw ngut ki nong Bangladesh ba kynthup ïa u Mohd. Sojibmiyan, Munna Khalid Ansari ba ju khot sin Munna Khan, Azarul Islam ba ju khot sin Jahangir bad Aakash Khan, bad Abdul Latif ba ju khot sin Mominul Ansari, ba ki la rung beaiñ shapoh u pud u sam ka India da kaba pyndonkam da ki kot ba shu thok bad ki la don bynta ha ka jingpynpoi pisa bad pynkylla jingmut ïa ki samla Muslim ban kyrshan ïa ka jingthmu jong ka Al-Qaida ha Bangladesh.
