Shillong, Naiwieng 13
U National President ka NPP bad Myntri Rangbah ka Jylla u Conrad K Sangma ha ka sngi Palei u la kyntait ïa ka jingkynthoh kaba dang shen na ki seng saiñpyrthei kiba don ha ka liang pyrshah, da kaba ong ba “ym don mano-mano ba treh ban kawang maw ïa u dieng u bym don soh.”
Haba ai jingkren ha ka jingïalang ban pdiang ïa u MLA barim ka Nongkrem, u Bah Lambor Malngiang bad ki nongkyrshan jong u, u Conrad u la pynskhem ba ka National People’s Party (NPP) ka sakhi ïa
ki kam jong ka ban “pynkylla” ïa ka Jylla Meghalaya, bad ka jingbym lah jong ki liang pyrshah ban pdiang ïa kane ka jingkiew ka la pynlong ïa ki ban pynsaphriang ïa ki khubor lamler bad pynthut ïa ka jingmut jingpyrkhat.
“Ki don shibun ki mat ba ki seng liang pyrshah ki ju rah pyrshah ïa ka NPP. Nga ju ong ïa baroh ba ym don mano-mano u ban kawang maw ïa u dieng u bym mih soh. Mynta, ki seng liang pyrshah ki ïohi bad sngewthuh ïa ka jait kam kaba ngi leh ban pynkylla ïa ka Jylla jong ngi. Ki don ïa ka jait kam kiba dang jia, kim kwah ban pdiang ïa ka roi ka par bad kim kwah ruh ba ki paidbah kin pdiang ne ïohi ïa ka. Kumta, ha ka jaka ban ïakren ïa ki mat pynroi ne ki mat ba kongsan jong ka Jylla, ki seng liang pyrshah ki pyrshang ban wanrah ïa ki jait khubor bapher-bapher ban pynkulmar jingmut ïa ki briew, bad ki khubor ki bym long satia kiba shisha.”
U Conrad u la kyntait halor ka jingmih khubor ba don ka jingbym ïasngewthuh jingmut hapoh ka NPP, kum ka jingkynnoh ba ka don ka jingbym ïasngewthuh hapdeng u Symbud Myntri Rangbah ka Jylla, u Bah Prestone Tynsong, bad u Symbud Myntri Rangbah ka Jylla, u Bah Sniawbhalang Dhar.
U la ong ba u la ïakren bad u Bah Sniawbha, uba la pynthikna ba ki khubor ki long ki bym don nongrim.
“Haba kane ka khubor ka la mih, nga la phone ïa u Bah Sniawbhalang Dhar bad nga la kylli ïa u, hato phi bitar?, U la ong ba ngam tip nangno kane ka khubor ka mih”, la pynpaw u Conrad.
“Ha ka jingim saiñ pyrthei jong nga baroh kawei kaba la neh palat 25 snem, ka rukom treikam jong ka kynhun NPP, nga pynthikna ba kan ym don kawei pat ka kynhun kaba kum kata,” u la ong da kaba pynksan ba ïa ki jingïapher jingmut la pynbeit hapoh bad ka seng ka ju pyni ïa ka jingïatylli.
U Myntri Rangbah u la pdiang ruh ïa u Bah Lambor bad ki nongkyrshan jong u, kiba la ïasoh bad ka NPP ha katei ka jingïalang, da kaba kdew ïa ka jingïadei kaba jylliew, kaba khlem saiñ hima sima kaba don tynrai ha ka jingburom markylliang bad ka jingkwah lang ban shakri ïa ka Jylla.
“Ka jingïadei paralok jong ngi ka long shabar jong ka saiñ pyrthei, kaba la pynshong nongrim ha ka jingshaniah bad ka jingkwah lang ban shakri beit ïa ki paidbah ka Jylla jong ngi”, u la bynrap.
U la ai khublei ïa ki nongwan rung thymmai kiba la buh jingshaniah ha ka jingthmu jong ka NPP ban pynkylla ïa ka Meghalaya bad pynskhem biang ïa ka jingthmu jong ka seng halor ka roi ka par bad ka roi ka par kaba kynthup lang ïa baroh ki konstitwensi.
