Paris, Naiwieng:
Ka France ha ka Sngi Palei, ka la kynmaw ia ka jingdap 10 snem jong ka jingjia thombor ha Paris, ha kaba ki lehnoh Islamic bad ki riew kheiñduh jongki, ki la leit ban thombor bad shim ia ka jingim jong 130 ngut ki briew ha katei ka jingjia, lyngba jong ki dukan bam kum ki Café, ki Restaurant bad ki jaka leh kmen, ha kaba bun na kiba lait im na katei ka jingjia ruh ki la shu im kum ki biej haduh kine ki sngi ba mynta. Kane ka jingjia, ka long kawei na ki kam thombor ba shyrkhei tam ba ka France ka la ioh mad, ha kaba ki paidbah nongshong shnong ki la dap da ka jingsyier kat ha ki jaka ba ki don.
Katei ka jingjia, ka sdang na ka jingjia bthei bom habar jong ka Stade de France Sports Stadium, ha kaba u President jong ka France ha katei ka por- u Francois Hollande bad u Myntri ka tnat kam bar ri jong ka Germany, ki dang iapeitkai ia ka jingialehkai ‘Friendly Soccer International’ bad kane ka jingjia ka la bteng pat sa ha ki 5 tylli kiwei pat ki jingjia synreit kuli jong ki ‘riewkieng-atiar kiba la leit synreit kuli ha ki 5 tylli ki jaka bad ki bynta jong katei ka ri.
