Shillong, Naiwieng 13
Ka Shillong Lajong FC ka la lah ban pynpaw ïa ka jingtbit na ka bynta ban long ka lahduh ha ka SSA Super Cup 2025, hadien ba ka la lah ban pynliem noh ïa ka Rangdajied United da 3-1 kol ha ka sngi Palei ha SSA Stadium kaba ha First Ground, Polo.
Kane ka jingïakhun ka la long kaba ïakhaid bha ha kaba da ki hajar ngut ki paidbah riew ïeit phutbol ki la wan ban sakhi da la ki jong ki khmat ïa ka jingïakhun kitei ki kynhun ba khlaiñ bor ka nongbah.
Ha kane ka jingïakhun u Denel-son Pyngrope u la pynkhih jar nyngkong eh na ka bynta ka Rangdajied ha ka minit kaba 25, hynrei shwa ban kut ka kylla step u Ïohborlang L Lyngkhoi (45+2) u la lah ban pynphai na ka bynta ka Lajong.
Hadien ba la bteng biang ïa ka jingïakhun jong ka kylla miet ka Lajong ka la thep biang sa ar kol lyngba u Wilbert Marbaniang (Player of the Final) ha ka minit kaba 55 bad 72 na ka bynta ban khur syndon ïa ka jingjop.
Ha kane ka sngi la ïadon lang u Myntri Rangbah ka Jylla u Conrad K Sangma, kumjuh u Myntri ka tnat ïalehkai Bah Wailadmiki Shylla, u Nongai jingmut ïa u Myntri Rangbah u Bah Paul Lyngdoh (MLA) bad u President ka SSA Bah Banteidor Lyngdoh (MLA) nalor kiwei pat kiba la sam ïa ki khusnam sha kine ki kynhun.
Ka Lajong kum ka lahduh ka la ïohpdiang ïa ka khusnam pisa kaba T. 2 lak tyngka, katba ka Rangdajied ka la ïohpdiang T. 1 lak tyngka.
Haduh ba la kut katei ka jingïakhun final, ka sam ruh ïa ka khusnam sha ka Langsning FC, kaba long ka lahduh ha ka Shillong Premier League 2025. Kane ka kynhun ka la ïohpdiang T. 6 lak tyngka bad ka Lajong, kaba la wan ba-ar ka la ïoh T. 3 lak. La sam ruh ïa ka khusnam shimet sha u Loving Suting jong ka Mawlai uba la ïoh ïa ka nam Top Scorer da kaba thep 7 kol.
Shuh shuh utei u Myntri Rangbah u la pyllait ruh ïa ka trophy jong ka lympung ïalehkai ba thymmai ka SSA Champions Cup, ka ban kynthup lang ki kynhun ki ban khur nam lahduh bad ba wan ba-ar ha baroh san tylli ki kyrdan ïalehkai. Ïa kane ka lympung la khmih lynti ban sdang ha ka taïew ba khatduh mynta u bnai hadien ba la kut ka First Division.
La kyrshan lang ïa ka SSA da ka tnat ïalehkai ka Sorkar Jylla na ka bynta baroh ki lympung ïalehkai bad na ka liang u Bah Wailadmiki u la pynbna ban ai T. 10 lak tyngka kaba long shi bynta ban kyrshan lang ïa kane ka synjuk.
