Nongstoiñ, Naiwieng 13
Watla ka dei tang ka jingkwah ban kilnamet ban pynwan dur ïa ka met ka phat bad lait na ka thiah sngi ne thiah thai, pynban mynta ka la long kum ka rynsan ka ban plie lad na ka bynta ban pyni ïa ki sap ba kyrpang bad ban leit shim bynta shabar na ka Jylla.
Kine ki dei ki samla na ka dong Mawlarshong kaba hap hapoh ka shnong New Nongstoiñ kiba la seng ïa ka West Khasi Hills District Calisthenics Association ha kaba ki la lah ban pyni ïa ka jingsting ha ka met ka phad da kaba kynthih bad ban pynpaw ïa ka sap jong ki. Kane ka sap ka jong kitei ki samla ka la wan ha ki rynsan social media mynta la katto katne snem.
Kitei ki samla ki ju pynlong ïa katei ka jingïalehkai harud jong ka wah Nondeiñ bad la ong ba ym tang ba kitei ki samla ki pynlut por ha ki jingïalehkai kilanmet, hynrei ki peitngor ruh ïa katei ka wah ban khang pyrshah na ka jingpynjot ïa ki doh-um doh-wah ha katei ka wah da kaba shoh dawai ne pynbthei bom.
La ong ba la sdang nyngkong ïa katei ka jingïalehkai naduh u snem 2021 hadien ka khlam Covid-19 hapoh ka jingïalam jong u samla James Lyngkhoi kum u nonglamkhmat bad u samla Aiborlang Marshillong kum u President jong katei ka synjuk.
Ki la ïathuh ruh ba shen kin sa leit ban ïashim bynta sha Goa, bad ki la kyntu ruh ïa ka Sorkar Jylla, ki nongmihkhmat ba kin sngewbha ban phai khmat lem sha ki ban shim khia khnang ba kin nanglah ban kyntiew shuh shuh ïa kane ka jingïalehkai.
