Shillong, Naiwieng 13
Ka kynhun ïalehkai ka Meghalaya ka la pynliem noh ïa ka Arunachal Pradesh da 8 wiket ha ka jingïalehkai kaba lai ‘one day’ jong ka U-23 men’s State A Trophy 2025-26 (plate group) ha ka sngi Palei ha Ropar, Punjab.
Ha kane ka jingïakhun ka Arunachal kaba la jop ïa ka kynting pisa, ka la shimti ban tied nyngkong ha kaba ka la kamai 79/10 hadien ka jingïalehkai bha u Gavineal Marpna ha ka jingkawang bol. Te kumta ka Meghalaya kaba la wan shimti ïa ka pali kaba ar ka la lah ban kynjoh sha ka thong tang ha ki 21.1 over bad shah pynhap 2 wiket.
Tang ar ngut ki nongtied ka Arunachal kiba la lah ban tied kham bun, ha kaba u kapten u Leki Tsering u la ïoh 25 run hashwa ba un shah pynkhyllem noh ha u Gavi lem bad u Amarjeet Sharma (15). U Manish Sharma (2/19) bad u PM Santhosh (2/26) ki la long ki ar ngut ki nongpynhap wiket na ka bynta ka Meghalaya.
Te kumta haba wan shimti ïa ka pali kaba ar, ka Meghalaya ha kaba sdang ka la duh noh ïa u nongtied ba nyngkong u Sachin Kumar (0) uba la ïatied lang bad u Dipankar Baruah (12), uba la shah pynkhyllem hadien. Hynrei u Shavian Blah (36 not out) bad u Pushkar Raj Singh (20 not out) ki la lah ban pynurlong ban kynjoh sha ka thong jong ka jingjop.
Lyngba kane ka jingjop, ka Megha-laya kan pynkhreh ïa ka jingïakhun ka ban wan pyrshah ïa ka Nagaland ha ka sngi Saitjaiñ ha Mohali.
