Shillong, Naiwieng 14
U Lat ka Jylla Meghalaya, u CH Vijayashankar u la bthah ïa ka tnad Social Welfare ban lum ïa ka thup jingtip kaba bniah haba ïadei bad ka jingdon ki khynnah ki bym ïohi ki khmat naduh ba dangkha bad kiba duna ka bor ïohi ki khmat hadien ba la dep kha, khnang ba lah ban wad ïa ki lad ki lynti ban ïarap ïa ki.
U Lat ka Jylla u la kdew ba ki don ki khynnah kiba la duh noh ïa ka bor ïohi ki khmat namar ki jingjia aksiden ne ki jingpang bad kine ki lah ban dang ïohi biang lada biang ka rukom sumar.
U la banjur ïa ka jingdonkam ïa ka jingkyrshan jong ki nongai jingïarap bad ka jingsumar kaba biang.
U la pyntip ruh ba ki don katto-katne ki jaka sumar, khamtam ha Kerala, ki don ki lad ban sumar ïa ki khynnah kiba hapoh 14 snem kiba don ïa ki jingpang duna haka bor ïohi ki khmat bad ki ai da ki jingsumar ba kyrpang jong ka Ayurvedic na ka bynta ki khmat.
Na ka bynta ki khynnah kiba duna ha ka bor ïohi ki khmat, u Lat ka Jylla u la ong, ka rukom sumar kaba 15 sngi ka lah ban pynbha shibun ïa ka bor ïohi jong ki lada don ka jingbuddien man ka por.
U la pynthikna ruh ba ka Sorkar kan kyrpad ïa kane ka jaka ai jingsumar ban pdiang ïa ki khynnah na ka Jylla Meghalaya ban ïoh ïa ka jingsumar.
Ïa kane u Lat ka Jylla, u la kren ha ka prokram ba kyrpang kaba la lum lang ïa ki khynnah kiba don ïa ki sap bapher-bapher ha Raj Bhavan ban rakhe ïa ka sngi kyrpang ki khynnah lane ka Children’s Day.
U Lat ka Jylla ha ryngkat ka kurim jong u, ki la pdiang bad ai khublei ïa ki khynnah bad pynpaw ïa ka jingkordor ban rakhe ïa kane ka sngi kyrpang ki khynnah lane ka Children’s Day bad ki khynnah kiba wan na ki skul bapher-bapher jong ka Jylla.
U la batai ïa kane ka jinglehkmen ïa ka sngi kyrpang ki khynnah ba ka don jingmut na ka bynta ka Raj Bhavan, kaba la lah ban pdiang ïa ki khynnah.
Haba pynskhem biang ïa ka jingkitkhlieh jong ka Jylla na ka bynta ka bha miat jong ki khynnah kiba don jingduna ha ki dkhot met, u Lat ka Jylla u la ong ba un pynïar ïa baroh ki jingkyrshan kiba lah.
U la kyntu ruh ïa ka tnad ban wad bad pynroi ïa ki sap jong kine ki khynnah, da kaba kdew ba bun ki lah ban pawnam kum ki nongtem, ki nongjngi lada ïoh ïa ka jinghikai kaba biang.
Ïa ka prokram Children’s Day la pynlong da ka tnad Social Welfare ha kaba la don ki jingshad ba pynshongshit, kynthup ïa ki jingrwai na ka kynhun tem ka GTC, ka ‘Presentation’ na ki khynnah Jyoti School bad ki jingrwai na ki arngut ki khynnah skul ba don jingduna ha ki dkhot met na ka skul ASHA, Shillong.
