Nongpoh, Naiwieng 14
Kumba ju long man la u snem, ka Ri-Bhoi Youth Federation (RBYF) Sengkmie hapoh ka jingïalam jong u President, Bah Bipul Thangkhiew ha ka Sngi Thohdieng ka la pynlong biang ïa ka jingsam khusnam bad pynkup burom sha 28 ngut ki samla pule ka Ri-Bhoi kiba la wan shakhmat ha ka eksamin SSLC bad HSSLC ba la pynlong da ka Meghalaya Board of School Education (MBoSE) ïa kaba la ai kyrteng kum ka ‘Topper’s Award Ceremony, 2025’.
Ha kane ka sngi, la wan ban ïadon lang da u Myntri ka tnad Community & Rural Development ka Jylla, u Bah Sosthenes Sohtun kum u kongsan nalor ka jingdonlang jong kiwei de ki nongïalam ka seng, ki samla pule kiba la shah jied ban ïoh khusnam lem bad ki kmie ki kpa jong ki.
Haba ai jingkren ha kane ka sngi, u Bah Sosthenes Sohtun u la ai ka jingïaroh sha ka seng RBYF kaba ju pynlong ïa kane ka prokram ban ai khusnam pynkupburom ïa ki khun samla ka Ri-Bhoi District kiba la lah ban ‘pass’ bha bad wan shakhmat ha ka risol SSLC bad HSSLC jong u snem 2025, kaba long kum shi bynta ka jingai mynsiem ïa ki samla pule ba kin dang lah ban lehbha shuh-shuh ha ki kyrdan ba kham shalor.
U Bah Sohtun u la ai ruh ka jingkhublei kaba kyrpang sha ki samla pule kiba trei minot bad trei shitom ban ïoh ïa ki kyrdan bahakhmat ha ka jingpule ka jong ki bad kyntu ruh ba kim dei satia ban duh jingkyrmen bad kut noh tang ha jingud bad jingaidaw, hynrei ban thom ïa ki jingeh da kaba ai nuksa ba bunsien ki ‘riewkhraw ha ka pyrthei ki dei kiba mih lyngba ka jingeh bad ka jingtrei shitom.
Shuh shuh, kumba ki khun samla ki dei ka lawei jong ka jaidbynriew, u Bah Sohtun u la ai mynsiem ruh ïa kine ki khun samla kiba la ïoh khusnam bad shah pynkup burom ha kane ka sngi ban dang trei minot bad trei shitom bad ba kin lah ban wanrah ïa ka nam ka burom ym tang ïa ka ïing ka sem, hynrei ïa ka shnong ka thaw, ka distrik bad ka Jylla hi baroh kawei.
Ha kane ka sngi la ïoh ruh ïa ka jingkren na u President ka seng, u Bah Bipul Thangkhiew uba la batai shaphang ka jingïaid lynti jong ka seng bad ka jingangnud jong ka ban kyntiew ïa ka pule-puthi na ka bynta ki khun samla ka Ri-Bhoi District.
La pynshongshit ruh ha kane ka sngi lyngba ka jingïadon ryngkat jong ka samla Kyntiewlin Mawphniang, kawei na ki nongrwai ba pawnam ka Jylla, kaba la ai ïa ki jingrwai kiba pynshoh biej bad pynum mynsiem ïa baroh kiba la wan ban sakhi ha kane ka jingïalang.
