Shillong, Naiwieng 14
Ka Hynñiewtrep Youth Council (HYC) ka la dawa ïa ka jingpynshai mardor bad pynsangeh ïa kano-kano ka jingthmu ban tei ïa ka temple ha ka phyllaw jong ka ophis Central Bureau of Investigation (CBI), Mawdiangdiang.
Ha ka shithi mudui ba la phah sha ka CBI Head of Branch ha ka sngi Thohdieng, ka HYC lyngba u President, u Bah Roykupar Synrem, ka la kynnoh ba ka jingtei kaba la pyntip ba dei ka temple ka la ïeng ha ka jaka jong ka CBI, kaba pynmih ïa ka jingsngewkhia ïa ka jingpynkheiñ ïa ka jingburom ïa ka jingngeit ñiam katkum ka riti synshar ka Ri bad ki aiñ jong ka Jylla.
U Bah Roykupar u la wad ïa ka jingpynshai kaba thikna ba hato don ne-em kum kane ka kam ban shna temple, da kaba ong ruh ba lada ka don kum kane, hato ki ïoh bor nangno?
U la dawa ruh ïa ka CBI ba kan pynshisha mardor halor ka jingtei ïa kano-kano ka jaka mane blei hapoh ka jaka jong ka CBI.
“Kano-kano ka jingtei khlem da ïoh jingbit, ka long ka jingpynkheiñ ïa ka aiñ. Nalor ka jingpynkheiñ ïa ka aiñ, ka long kaba pynkheiñ ruh ïa ka riti synshar,” la ong u Bah Roykupar.
U Bah Roykupar u la ong ruh ba kat bym pat pynshisha, baroh ki kam ba ïadei bad ka jingtyrwa lane ka jingtei ba dang ïaid ïa ki jaka mane blei dei ban pynsangeh shuwa mardor, ban khanglad ïa ka kam ka ban buh ha ka jingeh ban pynkylla biang ha kane ka jaka lane kaba lah ban long ka jingpynkheiñ ïa ka aiñ”
“Lada shem ba katei ka jingtei ka la sdang khlem da ïoh jingbit, dei ban leh ei-ei katkum ka Public Premises (Eviction of Unauthorised Occupants) Act, 1971 bad ban leh ei-ei kat kum ki kyndon ba ïadei ha ka Jylla Meghalaya, ban weng ïa kine ki jingtei ba khlem ïoh jingbit bad ban pynneh ïa ka phyllaw kumba ka long,” la bynrap u Bah Roykupar.
Nalor kata, u la kyntu jur ïa ka CBI, ban ai ïa ka jingpynshai mardor da ka jingthoh hapoh ar taïew, ban pyni ïa ka jinglong jingman ba mynta kumba ka long, ki jingai jingbit ba la ai lada don, bad ki sienjam ba la shim ban pynthikna ïa ka jingbud ryntih ïa ka riti synshar bad ka aiñ.
Shuh shuh u la ban jur ruh ba ka jingmudui kam long pyrshah ïa kano-kano ka jingngeit ñiam, hynrei ka thmu ban pynneh ïa ka jinglong bym shah shiliang ïa ka jingngeit ñiam bad ka jingïoh jingshaniah na u paidbah ïa ka CBI, ka tnad tohkit ka bym ïashah liang.
