Khliehriat, Naiwieng 14
Ka Sutnga SSCC kala bteng ban khur ïa ka jingjop bad bat ruh ïa ka kyrdan kaba nyngkong haka Super Division Football Tournament-5th Kyrmen Shylla Contribution Trophy ba la pynïaid da ka East Jaintia Hills District Football Association (EJHDFA).
Kane ka la wan hadien ba ka Sutnga SSCC kala pynliem ïa ka Dhana CSC da 2-1 kol ha ka jingïalehkai jong ka wat kaba Hynriew ha madan artificial turf Diengshynrum, Khliehriat ha ka 14 tarik Naiwieng.
Naka bynta ki kol jong ka Sutnga SSCC la thep da u Sauni Phawa ha ka minit 13 bad u Niponghi Sumer ha ka minit 90 lyngba ka penalty namar ka jingbakla u ‘rangapdien jong ka Dhana CSC.
Katba ïa ka shi kol ka Dhana CSC la thep da u Micheal Siangshai ha ka minit 23.
Shwa kane ka jingïalehkai hapdeng ka Ladrymbai B SC bad Rymbai Shkenshynriah SC ka la kut noh khlem da lah ban pynkhih ïaka jar kol.
