Nongstoiñ, Naiwieng 14
Ka Federation of Khasi Jaiñtia and Garo People (FKJGP) Mawshynrut Circle, mynta ka sngi ka la leit ban ïakynduh ïa u Additional Medical Health Officer bad ai ruh da ka jingthoh halor kiba bun ki jingdkoh jong ka Riangdo CHC.
U Bah Carry Kharmuti, Vice-President ka FKJGP, WKHD haba kren sha ki lad pathai khubor u la ong ba ka seng ka la lap ïa shibun ki jingduna jong katei ka PHC kaba la wanrah ruh ïa ka jingdkoh ha kaba ïadei ban ai jingshakri ïa ki paidbah ba donkam ban phah sumar ha katei ka CHC ha Riangdo khamtam ïa u duk u suk.
Shuh shuh utei Nongïalam ka Seng u la ong ruh ba katei ka CHC ka duna ruh ha ka jingdon ki doktor ki nongtrei nalor kiwei-kiwei, ha kaba u la kyntu ruh ïa ka Sorkar bad ïa ki nongmihkhmat bad kin shimkhia lem na ka bynta ban pynbit-pynbiang ïa katei ka CHC khnang ba kan long ka jingmyntoi ïa ki paidbah nongshong shnong ka thaiñ Mawshynrut bad jong ka WKHD hi baroh kawei.
