Washington, Naiwieng:
Ka United States ka la pynpaw ka jingsngewkhia kaba jur halor ka jingjia bthei bom kaba la jia hajan ka Red Fort hapoh Delhi, ha kaba 9 ngut ki la khlad hashen bad ka US ka la ong ba kane baroh ka dei ka kam thombor jong ki kynhun lehnoh. Kumta, u Secretary of State jong ka US, u Marco Rubio u la iaroh ia ka jingleh jong ka New Delhi ban shimkhia halor katei ka jingjia bad ban bud-dien noh khlem da pynslem bad u la ong ba ka jingleh jong ka India ka long kaba itynnad bad ka pynshisha ruh ia ka jinglong jong ka India kum ka ri paidbah, kaba pyrkhat na ka bynta ka bha- ka miat bad ka jingshngaiñ jong ki riew paidbah.
“Ki nong India ki donkam ban ïoh jingïaroh. Ki la long kiba shimkhia bha, kiba husiar bha bad kiba tbit bha ha ka rukom pyniaid ïa kane ka jingtohkit. Kane ka jingjia ka paw shai ba ka dei ka kam thombor jong ki lehnoh. Ka dei ka kali kaba la pyndap da ki tiar kiba lah ban bthei bha kaba la pynbthei bad pynïap ïa shibun ki briew,” ong u Rubio haba kren ha ki lad pathai khubor jong ka Delhi.
U la bynrap ba ka India ka leh ia ka kam kaba bha palat ban pynlong ia ka jingtohkit kaba pura bad u ngeit skhem ruh ba ka India kan sa pyllait paidbah ia ki kaiphod baroh ynda la dep ban bud-dien bad ynda la lap ia ki sakhi- sabut baroh.
U Myntri kam bar ri jong ka US u la kdew ba u la tyrwa jingïarap ia ka India ha ka jingiakren jong u bad u Myntri kam bar ri ka India- u S Jaishankar, hadien ka jingbthei bom hynrei u la bynrap ba ka India ka long kaba khlaiñ bor bad kam donkam jingiarap ban pyniaid ia ka jingtohkit.
U Jaishankar bad u Rubio, ki la ia kynduh ha shi-lynter jong ka jingialang jong ki Myntri kam bar ri jong ka kynhun G7 hapoh Canada. Ha ka jingiakren jong ki, u Rubio u la pynpaw ia ka jingsngewlem na ka bynta ki mynsiem briew kiba la duh noh ha ka jingbthei bom ha Delhi ha kine ki khyndiat sngi ba la leit. Ka jingialang ka la ktah ruh ia ki jingiadei arliang mamla ryngkat bad ki jingjia ha ka pyrthei.
