Nongstoiñ, Naiwieng 14
Ka ophis jong ka District Horticulture Officer (DHO) West Khasi Hills, District Nongstoiñ ka la ïoh ban pynlong ïa ka prokram kaba ar sngi lynter jong ka ‘KISAN MELA’ kaba hap hapoh ka ‘Mission for Integrated Development of Horticulture’ (MIDH) bad ka ‘FLOWER SHOW’ ha ryngkat ka jingïatreilang bad ka Nongstoiñ Agri- Horti Society.
La sdang ïa kane ka prokram ha ka 13 tarik Naiwieng bad la ïoh ban pynkut ha ka 14 tarik Naiwieng 2025.
Ïa kane ka prokram la pynlong ha ophis jong ka District Horticulture Officer Nongstoiñ, ha kaba u Bah S. Rani, Director Horticulture Shillong u la long u kongsan, ha ryngkat ka jingïadonlang jong ka Kong S.E. Marbaniang, District Horticulture Officer Nongstoiñ, Bah T. Diengngan ADH, Bah H.Ch. Marak ADH (MKT), Bah M. Makdoh ADA bad President bad Secretary jong ka Nongstoiñ Agri- Horti Society, ki nongrep napoh ki Block bapher jong ka West Khasi Hills District kumjuh ruh ki nongrep syntiew kiba la don haduh 77 ngut kiba la wan ban pyninam ïa ki syntiew ki skud jong ki.
U Bah S. Rani haba kren kum u kongsan u la pynkynmaw ba ka la poi biang ka juk ha kaba ka rep ka riang ka la kylla long ka kam kaba donkam tam na ka bynta ban pyndap ïa ka jingdonkam jong ki nongbam hapoh ka District bad wat ha ka Jylla ruh kumjuh bad ki dei ban pynshlur ïa ka rukom rep ba khlem ai dawai ka ban pynmyntoi ïa kane ka pateng bad ka pateng ka ban dang wan namar ka kam rep ka ai bylla ïa kiba bun.
Shuh shuh u la ong ba ka jingrep phan ka dei kawei na ka kam rep kaba pynmyntoi ïa kiba bun namar ïa u phan la pyndonkam baroh shi aïom, kumjuh, ka kam rep tit kam thung soh bad kiwei-kiwei.
U la ong ruh ba ha ka jingtyllun jong ka por wat ka jingthung syntiew ruh kam dei shuh tang hapoh kyrpong ïing lajong hynrei ka lah dei ka por ban ïa tynjuh bor haduh ki rynsan kiba heh na ka bynta ban ithuh ïa jingtreishitom jong ki nongrep bad lyngba ka ‘Floriculture Mission’ shibun ki jingmyntoi ki nongrep ki lah ban ïoh lyngba kane ka skhim.
La pynkut ïa kane ka prokram da ka jingsam ïa ki khusnam sha ki nongjop kiba la wan ban pyninam ïa ki jingthung jingthep jong ki, naduh u Pathaw, ka Kait, Kubi, Ngap, Sohniamtra, Sying bad kiwei-kiwei de ki jait jhur, ïa khusnam la sam lyngba ka tnat Horticulture katba ïa ka khusnam ki nongjop ha ka jingïakop pyni nam syntiew pat la sam da ka Nongstoiñ Agri- Horti Society.
Ka prokram kaba kham heh shuh shuh jong ka ‘KISAN MELA’ kan long biang ha ka 10 bad 11 tarik Nohprah 2025 kumta na ka liang ka District Horticulture Officer Nongstoiñ ka khot bad wer ïa ki nongrep ka District ba kin wan ban ïashim bynta shitrhem ha kitei ki ar sngi.
