Shillong, Naiwieng 14
Ka Sorkar Meghalaya Democratic Alliance (MDA) ha ka sngi Thohdieng ka la ai jingmynjur ban pynkylla (amendment) ïa ka Rule 6 (d) jong ka Meghalaya Ministerial District Establishment Service Rules, 2017.
Kane ka jingpynkylla (amendment) ka ong ba 50% ki kam Group D ha ki State Ministerial District Establishment, nangne sha khmat yn pyndap noh napdeng ki nongtrei ‘Casual’ ba trei khlem pat sangeh kam (regular).
U Myntri Sorkar Bah Wailadmiki Shylla haba kren sha ki lad pathai khubor hadien ka jingïalang ka kynhun myntri u la ong ba, kane ‘amendment’ ka pynbeit ïa ki kynrum kynram kiba la slem bha, kiba mih na ki Office Memorandum (OM) ba ïapher kawei ïa kawei pat.
Ka OM ba la pynmih ha u snem 1996 ka ong ba 50% la ai bhah ïa ki ‘Regular Casual Worker’ ne ki nongtrei ‘casual’ ba khlem pat sangeh kam katba ka OM u snem 2017 ka ong ba baroh ki kam Group-D dei ban pyndap lyngba ka jingpynrungkam beit-beit lane ‘direct recruitment’.
“Ngi la pynshai ba mynta ka sngi ngin ïaid noh da ka OM u snem 1996” ong u Bah Wailad haba bynrap ba kane ka ‘amendment’ ka ïaid katkum ka kyndon bad kan pynthikna ba ka jingpyntreikam ïa ka bhah ba 50% kan sdang naduh mynta.
