Nongpoh, Naiwieng 14
U Myntri ba dei khmih ïa ka tnad Tourism ka Jylla, u Timothy D. Shira ha ka sngi Thohdieng u la plie paidbah ïa u mot ba la shna bad pynwandur ha ka dur jong ka kjat kaba ïuh ïa ka pyrthei, uba la shna lyngba ki jaboh kiba la lum na ka Pung Umïam ha ka jaka jngohkai kaba don marjan bad ka thanad Umïam ha Ri-Bhoi District.
Kane ka projek ka dei kaba la sdang da ka Smart Village Movement (SVM) ka Jylla Meghalaya bad la bei tyngka pat da ka District Tourism Promotion Society (DTPS), Nongpoh kum shi bynta ban pynkylla ïa ki jaboh sha ki jingthaw dur kiba itynnad bad kiba lah ban khring ïa ki nongwan jngohkai pyrthei bad ban kyntiew ruh ha kajuh ka por ïa ka kam jngohkai pyrthei kaba don ïa ka mynsiem jingkitkhlieh na ka bynta ka khuid ka suba bad ka mariang sawdong-sawkun.
Ha kane ka sngi plie paidbah ïa utei u mot dur, la wan ruh ban ïadon ryngkat da u Deputy Commissioner ka Ri Bhoi District, u Abhilash Baranwal, ka Director ka tnad Tourism, ka Kong Brenda L. Pakyntein nalor kiwei ki heh ophisar bad nongshong shnong ka shnong Umïam.
Haba ai jingkren ha kane ka sngi, u Timothy D. Shira u la ai jingïaroh ïa kane ka sienjam kaba pynpaw ïa ka jinglong kitkhlieh ha ka kam jngohkai pyrthei, kaba kum ka Jylla Meghalaya ka don ïa ka thong ban kyntiew. U la ai khublei ruh ïa ka SVM, ka DTPS, ki bor pynïaid distrik ka Ri-Bhoi, ki nongshna jingshna bad kiwei de kiba la donkti ban pynurlong ïa kane ka kam.
Utei u Myntri Sorkar, u la ong ruh ba ka Pung Umïam kaba la shna ha ki snem 1960, ka dei kawei na ki jaka ba donnam tam ha ka Jylla, kaba la khring ïa ki phew hajar ngut ki nongwan jngohkai pyrthei man la u snem. Ha kajuh ka por, u la pynpaw ruh ïa ka jingeh kaba ïakynduh na ka jingsdang kylla sor bad ka jingbret pathar ïa ki jaboh, kaba la buh jingma pat ïa ka jingitynnad bad ka jingim jong kane ka pung.
U la ong ruh ba kane ka jingshna dur lyngba ki jaboh kiba la lum na ka Pung Umiam hi, ka pyn-i ïa ka jingkhraw jong ka kam jngohkai pyrthei lyngba ki kam kiba rit.
U Shira ha kane ka sngi u la ïathuh ruh ba na ka liang ka Sorkar India ka don ïa ka jingthmu ban shna ïa kumba 50 tylli ki jaka jngohkai pyrthei kiba ïa kot kyrdan bad ka pyrthei lane kita ki ‘World-class Tourist Destination’, ha kaba ka Sorkar Meghalaya ka la jied ïa ka Pung Umïam ban thaw ïa kawei na kita bad pynpaw ïa ka jingkyrmen skhem ba kane kan kyntiew shi kat dei ïa ki nongshong shnong ka Jylla, khamtam kito kiba sah marjan bad katei ka Pung Umïam.
Na ka liang u Abhilash Baranwal, Deputy Commissioner ka Ri-Bhoi ha ka jingkren ka jong u, u la ai ka jingïaroh ïa kane ka sienjam da kaba ong ba ka jingpyndonkam lyngba ki jaboh kiba don ha ka Pung Umïam, ka SVM ka la pyni kumno ba ka jngtriem mutdur jong ki briew ryngkat bad ka jingkithkhlieh ïa ka mariang, kan kyntiew ka rukom jngohkai kaba shisha, da kaba ong ruh ba ka pung Umïam hi ka dei kawei na ki jaka jngohkai kaba pawnam bha ha ka Jylla bad ka long kaba kongsan ban pynneh-pynsah ïa ka.
U la ong ruh ba kumba ïa une u mot uba la shna ha kane ka jaka, la pyndonkam tang da ki plastik, “ngim dei satia ban shu kheiñ ba ki plastik ki dei tang ki jaboh, hynrei lada ngi nang ban pyndonkam ha ka rukom kaba dei, kin ai jingmyntoi ym tang ïa ngi ki briew bad ka mariang ruh kumjuh.”
Katba na ka liang jong ka Kong Brenda L. Pakyntein, Director ka tnad Tourism ka la pynpaw ba kane ka sienjam ka ïadei dur ryngkat ki jingbuh kyndon jong ki kam jngohkai ha ka pyrthei halor ka jingpynneh-pynsah ïa ka mei mariang bad ban don ïa ka jingkitkhlieh. Ka la ong ruh ba ka jingkyntiew ïa ka kam jngohkai pyrthei kam dei satia ban wanrah pat ïa ka jingjot ïa ka mariang sawdong sawkun wat lada kane ka kam ka don ïa ka bynta kaba khraw ban kyntiew ïa ka ïoh ka ïoh ka kot ha kyrdan bapher-bapher, naduh ki jaka sah kiba remdor haduh ki nongsengkam sengjam ha ki shnong ki thaw.
Ka la pynpaw ruh ba wat lada kane ka projek kaba la plie paidbah ka dei kaba rit, hynrei kane ka sienjam ka pyn-i pat ïa ka jingrung jong ka jingmut jingpyrkhat ban wanrah ïa ka kam jngohkai kaba don ïa ka jingkitkhlieh wat haduh ki shnong ki thaw bad ba na ka liang jong ka tnad Tourism kan dang ïai kyrshan ïa kiba kum kine ki sienjam lyngba kiba bun ki skhim kiba la mang kyrpang da ka Sorkar.
