Shillong, Naiwieng 14
Ka Shillong Sports Association ka la pyllait paidbah ïa ki kynhun bad ki jingïalehkai na ka bynta ka Champions Cup 2025 kaba nyngkong jong ka, kaba la pynkhreh baroh ban sdang ha ka 24 tarik u Naiwieng.
Ka jingmut jong ka SSA, kane ka lympung ka long ba kan pynïasoh lang ïa ki nongjop jong ki san tylli ki kyrdan ïalehkai phutbol shynrang jong ka seng ha kawei ka jingïalehkai kaba stet bad kaba sngewtynnad. Ïa ki 10 tylli ki team kiba lah ban ïakhun la phiah ha ki ar kynhun ba san tylli bad kin ïakhun markylliang shisien, ha kaba ki ar kynhun kiba wan hakhmat eh na kawei ka kynhun kin rung sha ka semifinal.
Ki kynhun baroh kin beh ïa ka burom kaba ïaid ryngkat bad ka jinglong nongjop ba nyngkong eh ha kane ka lympung ‘championship’ bad kumjuh ruh ïa ka khusnam pisa kaba heh bha kaba T.8 lak na ka bynta ki nongjop, ka ban pynlong ïa ka kum kawei na ki lympung ïalehkai phutbol kaba kamai bha ha kano-kano ka jaka ha Meghalaya.
Kane ka lympung kan sdang ha kaba kut jong ka First Division kaba dang ïaid shakhmat. Ka Nongkseh bad Meghalaya Police ki la dep ban buh jaka ha ka Top 2 jong kane ka division, watla mano ban long ki lahduh ym pat lah ban rai.
Ka Group A ka kynthup ïa ki kynhun ba la jop ïa ka Shillong Premier League ka Langsning, ka Mylliem Lum (lahduh ha ka Second Division), ka Umlyngka (kiba wan ba ar ha ka kyrdan Third Division), ka Mawkasiang (lahduh ha ka Fourth Division) bad ka kynhun ba wan ba ar ha ka First Division.
Ka Group B ka kynthup ïa ka kynhun ba wan ba ar ha ka SPL ka Shillong Lajong, ka Laitkyrhong (kaba wan ba ar ha ka Second Division), Mawkriah West (ka lahduh ha ka Third Division), Mawlynrei (kaba wan ba ar ha ka Fourth Division) bad ki nongjop ha ka First Division.
Kane ka league kan sdang ïa ka jingïalehkai ha kaba ka Mawkasiang kan ïakhun pyrshah ïa ka Mylliem Lum ha ka por 1baje nohphai sngi ha ka 24 tarik u Naiwieng, katba ka Langsning kan ïakhun pyrshah ïa ka Umlyngka ha ka por 4:30 janmiet kham hadien ha kajuh ka sngi. Ka Semifinal kan long ha ka 9 bad 10 tarik u Nohprah bad ka phainal kan long ha ka 13 tarik u Nohprah.
Ïa ka trophy jong kane ka lympung la plie bad pyni paidbah hynnin ka sngi ha ka jingïalehkai phainal jong ka SSA Super Cup 2025 da u myntri rangbah u Conrad K Sangma ha ryngkat ka jingïadon lang u myntri ka tnad ïalehkai ‘Sports’ bad ka tnad ‘Youth Affairs’ u Bah Wailadmiki Shylla bad ki kapten bad ki nongpeit ïa ka kynhun jong ki 10 tylli ki klob.
Ki kynhun kiba ïashim bynta na ka Second, Third bad Fourth Division la shah ban soi haduh phra ngut ki nongïalehkai ban ai kylliang na ka bynta kane ka lympung ban pynïahap khyndiat ïa ka madan ïalehkai bad ban ailad ïa ki nongïalehkai na ki kyrdan ba kham poh ban pyntbit, ban ïalehkai bad ban ïakhun pyrshah ïa ki sap ba tbit tam jong ka jylla.
Kane ka jingïakob la khmih lynti ruh ba kan ai ka jingsngewthuh ïa ki ophisar haduh katno ka jingïapher ka long hapdeng ki kynhun ha ka kyrdan ïalehkai phutbol ha ka thaiñ katba kan ïarap ruh ïa ki nongjied/nongwad bniah na ki klob, ka SSA bad ka Meghalaya Football Association ban ithuh ïa ki nongïalehkai kiba dang kiew bad dang wan ha ki lower leagues.
Hynrei ki nongkyrshan phutbol kin kwah ïa ki jingïalehkai kiba ïalehkai da ka rukom lehkai ïakhun tyngeh. Ka jinglah ban shim kylliang ïa ki nongïalehkai ba pawnam kan ïarap shisha ïa kata bad, ryngkat bad ka jingkyrshan jong ki nongkyrshan kiba khraw bha kiba ki klob kiba kham poh ki don, ka SSA Champions Cup ka long kaba thikna ba kan long ka lympung ïalehkai kaba itynnad bad ka jingpynrung kaba phylla ha ka jingkdew por ha ki jingïalehkai phutbol jong ka thaiñ.
