Shillong, Naiwieng 14
Ka jingïalang kynhun Myntri ka Sorkar Jylla ba la long ha ka sngi Thohdieng, ka la ai jingmynjur ban thung biang ïa u Justice Shivaji Pande kum u President ka Meghalaya State Consumer Dispute Redressal Commission (MSCDRC).
Haba kren sha ki lad pathai khubor hadien ka jingïalang ka kynhun Myntri, u Myntri Sorkar u Bah Wailadmiki Shylla ula ong ba ka samoi treikam ba mynta jong u Justice Pande kan kut noh ha ka 6 tarik Nohprah 2025 bad katkum ki kyndon kiba don, u lah ban ïoh biang ïa ka samoi treikam ba saw snem, katkum ka rta ba la buh, kaba long 67 snem. Nalor kane, ka kynhun Myntri ka la phah ruh ïa ka kyrteng jong ki saw ngut ki dkhot ka Commission. Kiba kynthup ïa u Major Unsambyntalang Nongsiej, Rupa Paul Chaudhury, Nelisa F Kharshïing bad Bijloy A Sangma.
U Bah Wailadmiki u la pyntip ba ka kynhun Myntri ka la ai jingmynjur ïa ka Service Rule na ka bynta ka Meghalaya State Consumer Dispute Redressal Commission (MSCDRC), khnang ba ka Commission kan lah ban thung la ka jong ka ‘Recruitment Board’ haba ka thungkam ïa ki nongtrei.
Kumjuh ruh ka kynhun Myntri ka la ai jingmynjur ban pynkylla ïa ka Meghalaya Fiscal Responsibility and Budget Management (FRBM) Act, 2006.
Kane ka ‘amendment’ ka pynïahap ïa ka rukom pynïaid ïa ka pla tyngka ka Jylla bad ka rai jong ka Sorkar India ba ai jingbit ïa ka Jylla ban pynkiew ïa ka Fiscal Deficit na ka 3% sha ka 3.5% jong ka Gross State Domestic Product (GSDP) na ka bynta ki kam shim ram.
